Mae “unrhyw beth yn bosib” ym Mhencampwriaeth y Chwe Gwlad, yn ôl Warren Gatland, prif hyfforddwr Cymru.
Bu’r gŵr o Seland Newydd wrth y llyw am y tro cyntaf rhwng 2007 a 2019, ac fe fydd yng ngofal Cymru yn ystod Pencampwriaeth y Chwe Gwlad nesaf a Chwpan y Byd 2023 yn Ffrainc, gyda chyfle posib wedyn i aros tan ddiwedd Cwpan y Byd 2027.
Daeth hynny ar ôl i Wayne Pivac gytuno i adael ei swydd gydag Undeb Rygbi Cymru yn dilyn adolygiad o Gyfres yr Hydref, lle collodd Cymru dair o’u pedair gêm, gan gynnwys yn erbyn Georgia.
Mae Cymru bellach yn nawfed ar restr detholion y byd.
Roedd Warren Gatland yn brif hyfforddwr am ddeuddeg mlynedd, a llwyddodd i ennill y Gamp Lawn yn 2008, 2012 a 2019.
‘Dim ergyd rydd yn y Chwe Gwlad’
“Mae yna ddarlun mwy i edrych arno, ond dyw’r Chwe Gwlad byth yn ergyd rydd,” meddai Warren Gatland.
“Mae’n bwysig, ac mae wastad wedi bod yn bwysig i ni.
“Weithiau, yr hydref yw’r ergyd rydd. Dydych chi ddim yn cael ergyd rydd yn y Chwe Gwlad.
“Mae’n gystadleuaeth rydych chi eisiau ei hennill.
“Mae Iwerddon gartref yn gêm anodd, ond mae’n gêm wych i ni ac mae’n rywbeth y gallwn ni edrych ymlaen ati.
“Doedd [ennill Pencampwriaeth y Chwe Gwlad] ddim yn gredadwy bymtheg mlynedd yn ôl, felly mae unrhyw beth yn bosib.
“Rwy’n hynod o gystadleuol, a byddaf yn gwneud beth bynnag sydd ei angen i gael y tîm hwn i gystadlu â’r timau gorau yn y byd.
“Fe fydd hynny’n cymryd peth amser, ond gallaf warantu y byddwn yn gweithio’n hynod o galed. Rwy’n bositif y byddwn ni’n cystadlu yn arbennig o dda yn y Chwe Gwlad.”
