Bydd gwasanaeth coffa i Phil Bennett, un o fawrion rygbi Cymru a Llanelli, yn cael ei gynnal ym Mharc y Scarlets.
Mewn neges ar y cyfryngau cymdeithasol yn ddiweddar, dywedodd rhanbarth y Scarlets y bydd y gwasanaeth yn cael ei gynnal yn Llanelli ddydd Gwener, Mehefin 24.
Bu farw cyn-gapten a maswr Cymru a’r Llewod yn 73 oed.
Roedd Phil Bennett, oedd yn dod o Felinfoel ger Llanelli, yn ffigwr allweddol yn oes aur Cymru, gan eu helpu i ennill dwy Gamp Lawn ym Mhencampwriaeth y Pum Gwlad yn y 1970au.
Bu hefyd yn disgleirio ar daith ddiguro hanesyddol y Llewod i Dde Affrica ym 1974, gan wneud 20 ymddangosiad i’r Barbariaid yn ystod ei yrfa hefyd.
Mae’n cael ei ystyried yn un o’r chwaraewyr gorau i wisgo crys rhif 10 Cymru a’r Llewod.
Yn 1979, cafodd ei urddo ag OBE ac roedd yn sylwebydd gyda BBC Cymru ar ôl ymddeol o rygbi ac yn llywydd rhanbarth y Scarlets.
