Ken Owens
Bydd y Scarlets yn penderfynu yn ystod y dyddiau nesa’ sut i drin anaf i wddw eu capten a bachwr Cymru, Ken Owens.

Mae Owens, 27, sydd wedi chwarae 26 o gemau rhyngwladol dros Gymru, wedi cael sgan ar ei wddw i ddarganfod pa mor ddifrifol yw’r anaf.

Methodd fuddugoliaeth y Scarlets yn erbyn Treviso yn y PRO12 ddydd Sadwrn wedi iddo gael ei frifo wrth hyfforddi yn ystod yr wythnos.

Aros

“Rydyn ni wedi mynd drwy broses drylwyr o ymgynghori gydag arbenigwyr yn ystod y dyddiau diwethaf ar anaf Ken,” meddai Pennaeth Perfformiad y Scarlets, Andrew Walker.

“Byddwn yn penderfynu ar y camau gorau i’w cymryd yn y dyddiau nesa’.”

Chwaraeodd Owens i Gymru yn y tri phrawf diwethaf, gan gynnwys y ddwy gêm yn Ne Affrica ym mis Mehefin.