Roedd canlyniadau cymysg i dimau pêl-droed Abertawe, Caerdydd a Chasnewydd heno (nos Fawrth, Ebrill 20).
Abertawe 0-1 QPR
Collodd Abertawe o 1-0 yn erbyn QPR yn Stadiwm Liberty, gyda’r gôl fuddugol gan Lyndon Dykes yn dod ar ôl 88 munud.
Mae’r canlyniad yn gadael yr Elyrch â “thasg enfawr” wrth geisio ennill dyrchafiad awtomatig, yn ôl eu rheolwr Steve Cooper.
Mae naw pwynt yn gwahanu’r Elyrch, sy’n drydydd, a Watford yn yr ail safle yn y Bencampwriaeth gyda thair gêm yn weddill a naw pwynt ar gael.
Mae gan Watford wahaniaeth goliau o 14 dros yr Elyrch ar ôl iddyn nhw guro Norwich yn gynharach.
Brentford 1-1 Caerdydd
Mae gobeithion Brentford o ennill dyrchafiad awtomatig yn y fantol ar ôl i’w gêm gartref yn erbyn Caerdydd orffen yn gyfartal 1-1.
Chawson nhw mo’u helpu gan Watford chwaith.
Sgoriodd Kieffer Moore o’r smotyn cyn i Tariqe Fosu unioni’r sgôr ag ergyd o bell yn dilyn camgymeriad gan y golwr Alex Smithies.
Ond mae’r Adar Gleision allan o’r ras am le yn y gemau ail gyfle erbyn hyn – maen nhw ddeg pwynt islaw’r safleoedd ail gyfle gyda naw pwynt ar gael.
Casnewydd 2-0 Crawley
Mae Casnewydd yn seithfed yn yr Ail Adran ar ôl curo deg dyn Crawley o 2-0 yn Rodney Parade.
Sgoriodd Liam Shephard “gôl wych” yn gynnar yn yr ail hanner, yn ôl ei reolwr Mike Flynn.
Tarodd e ergyd o gornel y cwrt cosbi ar ôl casglu’r bêl yn gelfydd.
Cafodd Tom Nichols gerdyn coch am daro Shephard â’i benelin cyn i Aaron Lewis ddyblu mantais yr Alltudion yn hwyr yn yr ornest gyda chymorth yr eilydd Nicky Maynard.
