Mae Cymru’n cynllunio trafodaethau gyda Juventus ynghylch cael Aaron Ramsey ar gyfer gemau cymhwyso Cwpan y Byd.
Bydd Cymru’n dechrau eu hymgyrch gymhwyso Cwpan y Byd 2022 yr wythnos nesaf yng Ngwlad Belg ar Fawrth 24 cyn herio’r Weriniaeth Tsiec yng Nghaerdydd ar Fawrth 30.
Rhwng y ddwy gêm hynny, bydd Cymru hefyd yn herio Mecsico gartref mewn gêm gyfeillgar ar Fawrth 27.
Mae Aaron Ramsey wedi cael ei enwi yn y garfan, er iddo golli buddugoliaeth 3-1 Juventus yn Cagliari ddydd Sul (Mawrth 14) gydag adroddiadau yn yr Eidal yn awgrymu y bydd allan am dair wythnos.
Dim ond tair o 20 gêm olaf Cymru y mae Ramsey wedi’u dechrau, gydag ef yn tynnu allan o gemau rhyngwladol yn dipyn o thema dros y ddwy flynedd ddiwethaf.
“Mae’n rhaid i ni fod yn synhwyrol yn y ffordd rydym yn delio ag ef ac mae cyfathrebu rhyngom ni a’r clwb yn hanfodol,” meddai’r pennaeth dros dro Robert Page, a fydd unwaith eto’n sefyll i mewn i’r rheolwr absennol Ryan Giggs.
“Byddwn yn trafod gyda’r clwb ac yn gweld lle rydyn ni gydag ef.
“Ond mae’n rhaid i ni barchu efallai na fydd Juventus eisiau mentro ei chwarae a sicrhau ei fod yn aros yno i adfer.
“Ni fydd ein tîm meddygol yn cymryd unrhyw siawns os nad yw’n mynd i fod yn ffit, ond cawn weld a allwn ei gael draw yma i ni gael golwg arno.”
Cymru heb gynnal trafodaethau â Tottenham ynglyn â Gareth Bale
Dywedodd Page nad oes unrhyw drafodaethau wedi cael eu cynnal rhwng Cymru a Tottenham dros gyflwr Gareth Bale.
Mae Bale wedi dechrau pedair gêm olaf Tottenham yn yr Uwch Gynghrair ar ôl cael trafferth i sicrhau ei ffitrwydd ar gyfer rhan helaeth o’r ymgyrch.
“Nid ydym wedi siarad gyda nhw,” meddai Page pan ofynnwyd iddo a oedd wedi siarad â Jose Mourhino, rheolwr Tottenham.
“Rwy’n credu ei fod yn deall hefyd bod gennym gemau pwysig, ac rwy’n dal i ddweud bod gennym dîm meddygol sy’n deall beth maen nhw’n ei wneud o ran Gareth.
“Mae’n chwarae mwy o funudau yn dod i mewn i’r gwersyll hwn yn fwy ffit na’r oedd yn y gwersyll ym mis Tachwedd, pan nad oedd wedi chwarae llawer o funudau ac fe wnaethon ni reoli ei lwyth yn dda.
“Nid yw hynny’n wahanol nawr.”
