Mae Clwb Criced Morgannwg wedi denu Shubman Gill, chwaraewr rhyngwladol o India, am bedair gêm Bencampwriaeth ola’r tymor, wrth iddyn nhw geisio dyrchafiad i’r Adran Gyntaf.
Bydd y batiwr 22 oed ar gael ar gyfer yr ornest yn erbyn Swydd Gaerwrangon yng Nghaerdydd, sy’n dechrau ddydd Llun (Medi 5).
Mae e wedi chwarae mewn 11 o gemau prawf, gan sgorio 579 o rediadau ar gyfartaledd dros 30, ac mewn naw gêm undydd ar gyfartaledd o 71.28 dros ei wlad.
Mewn gemau dosbarth cyntaf, mae e wedi sgorio 2,877 o rediadau ar gyfartaledd o 53.27, gan gynnwys saith canred.
“Dw i’n edrych ymlaen at ymuno â charfan Morgannwg wrth iddyn nhw wthio am ddyrchafiad,” meddai Shubman Gill.
“Dw i wedi mwynhau chwarae yma erioed, a dw i wedi cyffroi o gael profi criced sirol a’r heriau a ddaw yn ei sgil.
“Hoffwn ddiolch i Forgannwg a’r BCCI (Bwrdd Rheoli Criced India) am y cyfle, ac alla i ddim aros i gael dechrau i Forgannwg a phrofi fy hun yn ystod rhan allweddol o’r tymor.”
‘Ychwanegiad gwych’
“Mae Shubman yn ychwanegiad gwych i’r garfan wrth i ni fynd i mewn i ddiwedd Pencampwriaeth y Siroedd,” meddai Mark Wallace, Cyfarwyddwr Criced Morgannwg.
“Mae e’n un o’r batwyr ifainc mwyaf cyffrous yn y byd, ac mae ganddo fe brofiad eisoes o fatio yn yr amodau hyn yn ystod ei gyfnod gydag India.
“Gyda Colin [Ingram] a Marnus [Labuschagne] i ffwrdd, roedd angen i ni gryfhau brig y rhestr fatio, a gyda’i brofiad rhyngwladol, Shubman yw’r un delfrydol i gyfro hynny.”
Pwy yw Shubman Gill?
Y tu hwnt i’r byd criced, mae Shubman Gill wedi’i gysylltu’n rhamantaidd â nifer o fenywod blaenllaw.
Fe fu adroddiadau’n ddiweddar ei fod e mewn perthynas â Sara Ali Khan, yr actores Bollywood sy’n ferch i Saif Ali Khan, un o’r actorion Bollywood cyfoes enwocaf a’r actores Amrita Singh. Mae Saif Ali Khan yn fab i Mansur Ali Khan Pataudi, cyn-gapten India.
Mae e hefyd wedi’i gysylltu yn y gorffennol â Sara Tendulkar, merch Sachin Tendulkar, un o fawrion India a’r byd criced.
