Marl Cavendish yn cael ei gyfweld yn Blackpool
Bu Mark Cavendish yn fuddugol am yr ail ddiwrnod yn olynol wrth ennill y pedwerydd cymal ar bromenâd Blackpool. Roedd Steele van Hoff (GRS) yn ail a Leigh Howard (OGE) yn drydedd.
Roedd ei fuddugoliaeth prynhawn ma’ yn sicrhau y bydd Cavendish yn gwisgo crys melyn arweinydd y ras.
Tywydd garw
Bu 94 o seiclwyr yn dechrau’r cymal heddiw o Carlisle i Blackpool, pellter o 156km sef 97 milltir. Roedd chwech o seiclwyr wedi creu bwlch o dros chwe munud ar ôl ugain milltir ger Penrith, ac roedd nifer ar strydoedd y dre, er gwaethaf y tywydd erchyll.
Ar un adeg, oedd Niklas Gustavsson (UKY) i bob pwrpas yn arwain y ras, oherwydd roedd ond 17 eiliad ar ôl arweinydd y ras Leigh Howard (OGE). Krisitian House (RCS) oedd yn fuddugol ar y mynyddoedd, ac felly’n cadw’i afael ar y crys KOM. Roedd miloedd yn aros am y seiclwyr yn Blackpool, ac oherwydd bod y ras yn arafach na’r disgwyl, fe gyrhaeddodd yr haul mewn pryd.
Dywedodd Cavendish ar ôl derbyn y crys melyn: “Mi wnâi ildio’r crys fory mwy na thebyg, oherwydd mynyddoedd y Peak Disitrict,” meddai.
Mae bwlch o 6 eiliad rhwng Cavendish a Howard yn ail, gyda’r gŵr o Gaerdydd Luke Rowe (Sky) yn bedwaredd.
Garmin Sharp sydd ar frig y timau. Boy Van Poppel (UHC) sy’n gwisgo crys y pwyntiau a Peter Williams (NGR) sy’n gwisgo crys y gwibiwr.
Ronan Mclaughlin o Iwerddon enillodd gwobr y combatiivity.
Yfory bydd y ras yn dychwelyd i Stoke-on Trent gyda 91 milltir yn wynebu’r seiclwyr.
Adroddiad: Tommie Collins
