Mae Jonny Clayton drwodd i drydedd rownd Pencampwriaeth Byd Dartiau’r PDC, ar ôl curo Keane Barry o 3-2.
Doedd hi ddim yn fuddugoliaeth gyfforddus o bell ffordd i’r Cymro Cymraeg o Bontyberem, yn dilyn gornest o safon eithriadol yn erbyn y Gwyddel.
Roedd deg sgôr o fwy na chant rhwng y ddau chwaraewr i ennill gemau – does neb wedi cael mwy mewn gêm am y gorau i ennill tair set.
Cafodd Clayton wyth sgôr o 180, ac fe wnaeth e orffen gyda chyfartaledd tri dart o 103.70 yn yr ornest.
Ond roedd e ar ei hôl hi o 2-1 ar ôl dechrau gwael, cyn taro’n ôl a dangos ei safon yn y pen draw.
Dangosodd Keane Barry ei fod e’n un i’w wylio yn y dyfodol, gyda sawl sgôr swmpus – 104 i dorri tafliad Clayton yn y set gyntaf, ac yna 116, 136 a 121 wrth iddo fe fynd ar y blaen o 2-1 mewn setiau.
Yn yr ail set, methodd Clayton ag ymgais at y dwbl 20 ac fe aeth Barry yn ei flaen i ennill y drydedd set i’w gwneud hi’n 2-1, gyda Barry yn taflu 100 a 114.
Taflodd Barry 122 i ennill y drydedd set i’w gwneud hi’n 2-1 cyn i Clayton daro’n ôl gyda 100 i’w gwneud hi’n 2-2 mewn setiau.
Erbyn i Clayton sgorio 78 yn y gêm olaf i gipio’r fuddugoliaeth, roedd e wedi ennill chwe gêm yn olynol ar ôl i Barry golli’i ffordd, ac mae’n siŵr y bydd ei ochenaid o ryddhad yn yr Alexandra Palace i’w glywed ’nôl adref yng Nghwm Gwendraeth.
𝗦𝗜𝗫 𝗢𝗡 𝗧𝗛𝗘 𝗦𝗣𝗜𝗡 𝗧𝗢 𝗪𝗜𝗡 𝗜𝗧! 🏴
A record-breaking match between two incredible talents sees Jonny Clayton advance, clinching the deciding set to defeat Keane Barry 3-2!
TEN ton-plus finishes in a best of five sets match – incredible. #WHDarts pic.twitter.com/O50v2jYpIn
— PDC Darts (@OfficialPDC) December 19, 2021
Ymateb
“Gêm wych, a phob clod i Keane,” meddai Jonny Clayton wrth Sky Sports.
“Chwarae teg iddo fe, wnaeth e ddim rhoi un cyfle i fi ymlacio.
“Roedd hi’n gêm wych, ac mae’n siŵr taw honna yw un o fy hoff gemau dw i wedi’u chwarae.
“Roedd angen i’r ddau ohonon ni daflu allan yn dda, dyna’r math o gêm oedd hi.
“Gwych! Hollol wych!
“Ar ddiwedd y dydd, rydyn ni i gyd fel chwaraewyr yn hela’r un tlws, ac mae’r flwyddyn hyd yn hyn wedi bod yn wych a gobeithio y galla i ei gorffen hi gyda hwn.
“Mae hi wedi bod yn braf cael brêc. Yn bersonol, dw i’n ddiog wrth ymarfer, felly dw i ddim wedi ymarfer llawer.
“Mae’n braf cael brêc jyst i gael canolbwyntio eto i gael mynd yn ôl i fwynhau’r hyn rydyn ni’n ei wneud.
“Byddwn i wrth fy modd yn ennill y tlws.
“Gallai’r ‘Ferret’ fod ar y tlws, felly gobeithio mai fy mlwyddyn i yw hi.”
