Jade Jones eisiau bod yn ‘arwr’ yn ei champ

Jade Jones
Mae’r ymladdwr taekwondo Jade Jones wedi dweud ei bod hi eisiau bod yn “arwr” yn ei champ ar ôl ennill medal aur yng Ngemau Ewrop neithiwr.

Cipiodd y ferch 22 oed o’r Fflint y fuddugoliaeth ar ôl trechu Ana Zaninovic 12-9 yn yr ornest derfynol, a hi yw’r trydydd athletwr i ennill aur dros Brydain yn y Gemau yn Baku.

“Mae’n wych cyflawni cymaint ar oed mor ifanc, ond mae gen i dal deitlau byd ac Ewropeaidd i’w hennill. Dw i eisiau dod yn arwr yn fy nghamp, felly dydw i ddim wedi gorffen eto,” meddai Jade Jones.

“Roeddwn i’n siomedig iawn ar ôl pencampwriaethau’r byd [pan gollodd diolch i gamgymeriad sgorfwrdd] ac fe wnes i’n dda jyst i fynd nôl i ymarfer. Roeddwn i eisiau hyn cymaint, ac ro’n i’n cario ‘mlaen dweud wrth fy hun mod i ddim eisiau colli hynny eto.”

Ychwanegodd nad oedd hi wedi ymladd i “100%” o’i gallu yn y gystadleuaeth eleni, ond ei bod hi wedi “gwella tipyn” dros yr wythnosau diwethaf.