Mae John Hartson wedi tynnu blewyn o drwyn newyddiadurwr a feirniadodd safon ei Gymraeg.
Daeth yr ymateb diweddaraf wrth iddo ef a’i gyd-sylwebydd, Gwennan Harries, gael eu cyflwyno gan Dylan Ebenezer ar ddechrau rhaglen Sgorio Cymru v Estonia neithiwr (11 Hydref).
Wrth dynnu coes, dywedodd Dylan Ebenezer yn gellewirus: “Croeso mawr atom ni. ‘Welcome, John!’
Yn wen o glust i glust dywedodd Hartson, tra’n pwyntio ei fys yn ffug-fygythiol at Ebenezer: “Hei! bod yn ofalus, reit, dim gormod o ‘Wenglish’ heno!”
Atebodd Ebenezer: “Dim heno! Dwi’n addo!”
Meddai Hartson (a’i dafod yn ei foch): “Watsiad di dy hunan!” tra ychwanegodd Ebenezer: “Hyfryd cael ti ar y rhaglen, fel arfer, John.”
Fe dderbyniodd Hartson, cyn chwaraewr rhyngwladol Cymru, a chwaraeodd i glybiau fel Celtic, Arsenal, Luton a West Ham, sylwadau beirniadol am safon ei Gymraeg gan ohebydd o’r Western Mail, Rob Harries, yn ystod darllediad gêm Cymru v Y Weriniaeth Tsiec wythnos diwethaf.
Yn ei drydar, ysgrifennodd Harries: “Literally half the words John Hartson uses on S4C are English. Can’t they get a Welsh speaker?”
Ond doedd Hartson ddim i weld yn poeni am y feirniadaeth honno, wrth iddo barhau i sylwebu yn ei ffordd arferol ar y rhaglen nos Lun.
‘Dim gormod o Wenglish heno!’ ?
@JohnHartson10, @DylanEbz a @gwennanharries yn fyw ar S4C.
????????? #WCQ2022 pic.twitter.com/m3mxIgH5hy— Sgorio ⚽️ (@sgorio) October 11, 2021
Mae miloedd o bobol wedi dangos eu cefnogaeth i Hartson a gafodd ei fagu ar stad dai cyngor Trallwn, Abertawe – ar ei gyfrif Trydar.
Pam wyt ti'n chwilio am ffordd i roi rhywun lawr? Ma' John Hartson yn un o eiconau'r gêm yng Nghymru ac yn mynegi ei farn yn ein hiaith NI! Mae'r Gymraeg i BAWB.
— Ciaran Llewelyn??????? (@CiaranLlewelyn) October 9, 2021
Roedd John Hartson hefyd yn ymddangos ar raglen Sgwrs dan y Lloer ar S4C neithiwr, lle bu’n siarad am y cyfleoedd mae wedi eu cael drwy’r Gymraeg.
“Fi’n teimlo’n blessed, achos oedd Mam wedi hala fi i ysgol Gymraeg,” meddai ar y rhaglen.
“Nawr, dw i’n cael rhywbeth allan o’r ffaith fy mod i’n siarad Cymraeg.
“Yr holl bobol dw i wedi gallu cwrdd â drwy weithio ar S4C – pobol o Tinopolis, pobol o Heno – a’r holl sioeau dw i wedi gwneud dros y blynyddoedd yn Gymraeg.
“Mae’n beth da fy mod i ddim jyst wedi gwastraffu fe.”
Soniodd Hartson ar y rhaglen hefyd am ei frwydrau llwyddiannus i orchfygu cancr o’r ceilliau a ymledodd i’w ymennydd a’i frwydr yn erbyn bod yn gaeth i gamblo.
