Miriam Elin Sautin o Lanbedrog ym Mhen Llŷn yw enillydd Medal Ddrama Eisteddfod yr Urdd 2020-21.
Daeth chwe darn i law’r beirniad, ond Miriam Sautin ddaeth i’r brig gyda “drama afaelgar a safonol” sy’n “llawn dirgelwch ac amwynder gyda diweddglo cryf”.
Carys Bradley-Roberts o Gaerdydd ddaeth yn ail am y Fedal Ddrama, ac Elis Siôn Pari o Aberdaron ddaeth yn drydydd.
Drwy gydol yr wythnos hon, mae’r Urdd yn gwobrwyo’r gwaith buddugol ddaeth i law ar gyfer Eisteddfod yr Urdd 2020.
Cafodd yr Eisteddfod honno yn Ninbych yn gohirio llynedd, ac eto eleni, oherwydd y pandemig.
Creadigol
Yn gyn-ddisgybl yn Ysgol Botwnnog a Choleg Meirion Dwyfor Pwllheli, aeth Miriam Sautin yn ei blaen i gwblhau gradd mewn Ffrangeg a Sbaeneg ym Mhrifysgol Durham.
Wedi hynny, treuliodd ddwy flynedd yn dysgu Saesneg Iaith a Llenyddiaeth ym Mhrifysgol Limoges a Lyon yn Ffrainc, lle’r oedd hi hefyd yn cynnig gwersi ysgrifennu creadigol.
Mae hi bellach yn byw yng Nghaerdydd, ac yn gweithio i Lenyddiaeth Cymru.
Bydd hi’n derbyn medal wedi’i chreu’n arbennig gan gwmni gemwaith Rhiannon o Dregaron, a bydd yn cael cyfle i dreulio amser gyda Theatr Genedlaethol Cymru yn datblygu’r gwaith buddugol.
Fe fydd hi hefyd yn derbyn hyfforddiant pellach gyda’r BBC, yn datblygu syniadau gyda Choleg Prifysgol y Drindod Dewi Sant, yn treulio amser gyda S4C, ac yn cael cyflwyniad i ysgrifennu ar gyfer y teledu.
“Calonogol”
Roedd gofyn i gystadleuwyr gyfansoddi drama a fyddai’n cymryd rhwng 40 a 60 munud i’w pherfformio, ac yn ôl y beirniaid Llinos Gerallt a Sian Naiomi, roedd y chwe drama ddaeth i law yn “gyfoes a pherthnasol”.
“Hoffem ddiolch i bob cystadleuydd am eu hymdrechion a’u hymroddiad,” meddai’r beirniaid.
“Roedd yr ysgrifennu yn sensitif, tyner a theimladwy. Calonogol iawn oedd darllen ambell berl o linell a wnaeth wir argraff arnom.
“Roedd cyfeillgarwch yn elfen amlwg iawn drwy’r gystadleuaeth a’r berthynas fregus a chymhleth rhwng ffrindiau yn mynd â bryd nifer o’r dramodwyr.”
“Celfydd”
Gosodwyd y gwaith mewn dau ddosbarth, gyda phedwar darn yn cyrraedd y dosbarth cyntaf.
Fe wnaeth drama Miriam Sautin hawlio sylw’r beirniaid o’r dudalen gyntaf, meddai Llinos Gerallt.
“Mae’r berthynas rhwng dwy ffrind yn gymhleth a chyfoethog, gyda’r plot yn datblygu’n gelfydd wrth inni dyrchu i’w gorffennol,” meddai.
“Drama sy’n llawn dirgelwch ac amwynder gyda diweddglo cryf. Mae cymhlethdod a blerwch bywyd i gyd yma.
“Mae’r dramodydd hefyd yn fardd, ond yn gofalu nad yw’r barddoniaeth yn tarfu ar lif a thempo’r ddrama.”
Bydd Miriam Sautin, a Carys Bradley-Roberts ac Elis Siôn Pari, yn cael gwahoddiad i gymryd rhan yng Nghwrs Olwen yng Nghanolfan Ysgrifennu Tŷ Newydd.
Mae’r Urdd wedi sicrhau y bydd y gwaith sy’n dod i’r brig yn gweld golau dydd drwy gyhoeddi Deffro – y cyfansoddiadau ar eu newydd wedd – a fydd allan ddydd Gwener (22 Hydref).
Gallwch ddarllen sgyrsiau gyda dau o brif enillwyr eraill yr wythnos yma:
Yr argyfwng hinsawdd yn ysbrydoli gwaith buddugol Coron yr Urdd 2020-21
