Yn dilyn llwyddiant cystadleuaeth Her Ffilm Fer Hansh y llynedd, bydd y gystadleuaeth eleni yn dathlu Mis Hanes LHDT+.
Mi fydd gofyn i gystadleuwyr greu ffilm fer wreiddiol mewn 48 awr sydd yn canolbwyntio ar y gymuned lesbiaidd, hoyw, deurywiol neu thrawsryweddol.
Bydd yr enillwyr yn ennill gwobr o £1,000, yn ogystal â thocyn VIP i Ŵyl Gwobrau LHDT+ Iris ym mis Hydref, lle fydd y ffilm fuddugol yn cael ei dangos.
Bydd hefyd cyfle i’r enillwyr ddatblygu eu syniad ymhellach gydag Academi Ffilm Iris, sef cynllun sydd yn cael ei redeg mewn partneriaeth gydag S4C a Phrifysgol De Cymru.
‘Torri tir newydd’
Y comedïwr Steffan Alun, yw cyflwynydd yr her eleni, a bydd yn ymddangos mewn cyfres o fideos ar dudalennau Hansh drwy gydol y gystadleuaeth.
“Ar nodyn personol, fel dyn deurywiol, mae’n gyffrous gweld yr her yn manteisio ar Wythnos Hanes LHDT+, dyma gyfle gwych i bob un ohonon ni ddathlu gyda’n gilydd,” meddai.
“Hyd yn oed heddiw, ry’n ni’n bell ar ei hôl hi fel cenedl o ran cynrychioli straeon LHDT+ yn y cyfryngau, felly mae cyfle anhygoel yma i ffilmiau Her Ffilm Fer dorri tir newydd.
“Mae’r straeon yma’n digwydd bob dydd yn y byd go iawn, felly mae’n hen bryd i ni weld ein ffilmiau’n adlewyrchu hynny.
“Mae’r gystadleuaeth ar agor i bawb, ac mae hynny mor bwysig. Mae’n hawdd meddwl, ‘nid fy lle i yw cymryd rhan mewn cystadleuaeth fel hon’. Rhaid newid hynny!”
‘Agored i bawb’
Eglurodd Guto Rhun, Comisiynydd Cynorthwyol Hansh, eu bod nhw wedi penderfynu cynnal y gystadleuaeth fis Chwefror eleni er mwyn dathlu Hanes LHDT+.
“A hithau’n fis Hanes LHDT+ yn ystod mis Chwefror, rydyn ni wedi penderfynu cynnal yr her yn ystod y cyfnod yma i ddathlu cyfraniad y gymuned LHDT+ at fywyd yng Nghymru,” meddai Guto Rhun.
“Mae’r gystadleuaeth yn agored i bawb ac mi ydyn ni’n hynod gyffrous i weld sut y bydd gwneuthurwyr ffilm Cymru yn adrodd straeon sydd yn dathlu’r gymuned amrywiol yma, sydd wedi ei dan gynrychioli dros y blynyddoedd.
“Rydyn ni’n falch iawn i gyd-weithio gyda Gwobr Iris ac yn ddiolchgar iawn am eu cyfraniad tuag at wobr yr her eleni. Pwy a ŵyr, efallai bydd enillydd y Wobr Iris ymysg ein cystadleuwyr eleni? Pob lwc i bawb!”
? HER FFILM FER 2021 ?
Diddordeb mewn creu ffilmiau? Eisiau ennill £1000… a mwy? Mae Her Ffilm Fer Hansh yn ôl i ddathlu mis hanes LHDT+ ?️?
Y Sialens: creu ffilm fer mewn 48 awr, ond cofia fydd yna dwist!!Am fwy o wybodaeth: https://t.co/FbjtHtABDi pic.twitter.com/gNoDt4Z84o
— Hansh (@hanshs4c) January 22, 2021
