Mae’r DJ a’r cyflwynydd radio Katie Owen yn dweud mai “deall cerddoriaeth yn yr iaith Gymraeg” yw ei phrif ysgogiad dros ddysgu’r iaith.
Yn enedigol o Ferthyr Tudful, ac wedi ei magu ym Mhontyclun, mae Katie wedi teithio’r byd yn gweithio fel DJ yn agor sioeau i fandiau fel Kasabian, Stereophonics a Madness yn ogystal â pherfformio mewn gwyliau cerddorol ledled Ewrop
Hi yw’r seleb ddiweddaraf i gymryd rhan yn y rhaglen ar Iaith Ar Daith, fydd yn cael ei ddarlledu nos Sul (Mai 8) ar S4C.
Yn ymuno â hi ar y daith mae’r DJ a chyflwynydd radio Huw Stephens.
Bydd y ddau yn ddechrau ar eu taith gydag ymweliad i Stiwdio Rockfield yn Sir Fynwy, lle bydd Huw yn adrodd hanes y stiwdios a rhai o’r bandiau mawr sydd wedi recordio yno, gan gynnwys Queen a’r Super Furry Animals.
Rhywbeth arall mae Katie yn angerddol amdano yw pêl-droed, felly bydd y ddau yn ymweld â’r siop bêl-droed Spirit of ‘58 yn y Bala.
Yna, bydd y disgybl yn troi’n athro wrth i Katie roi dosbarth sgiliau DJ i grŵp o blant lleol ym Mlaenau Ffestiniog.
‘Deall cerddoriaeth yn yr iaith Gymraeg’
“Oherwydd fy mod i’n gweithio yn y byd miwsig, hoffwn i allu deall cerddoriaeth yn yr iaith Gymraeg,” meddai Katie Owen.
“A hefyd hoffwn i allu siarad yr iaith oherwydd mae hi mor hardd.
“Dwi ddim yn gwybod lle dwi’n mynd gyda Huw – bydd e ychydig o magical mystery tour.
“Dwi’n teimlo’n nerfus ond cyffrous.”
Ychwanegodd Huw Stephens: “Beth fi’n caru am Katie yw ei brwdfrydedd hi am gerddoriaeth a’i brwdfrydedd dros fod yn Gymraes.
“Ar gyfer y daith yma, dwi’n gobeithio gallwn ni gyfuno diddordeb Katie yn yr iaith Gymraeg a cherddoriaeth o Gymru.”
