Rydan ni’n mynd yr holl ffordd o Gymru i Texas yn yr Unol Daleithiau ar gyfer y pryd arbennig hwn – 4,860 o filltiroedd awyr i ffwrdd, a bod ychydig yn fanylach.
Mae’r caserol yn dyddio ’nôl i’r 1940au-50au, ond bellach yn cael ei fwynhau mewn gwledydd o amgylch y byd.
Yn ogystal â bod yn bryd gwych i’w rannu, yr hyn sy’n grêt am y caserol hwn yw fod modd ei goginio ymlaen llaw a’i weini pan ydych chi’n barod i wneud hynny. Mae hyn yn arbed amser a gall wneud cynllunio prydau yn fwy effeithiol.
I ffwrdd â ni, felly, ar antur goginio arall! Mae’r caserol hwn yn gyfuniad perffaith o’r hufennog a’r cawslyd.
Beth ydw i ei angen?
Olew coginio (2 lwy fwrdd)
Hanner cwpan o bupur lliwgar
Hanner cwpan o nionod wedi’u torri’n fân
Tun o gawl cyw iâr hufennog
14.5 owns o domatos a tsili wedi’u torri’n fân
2 gwpan o gyw iâr (‘chicken breast’ wedi’u coginio a’u torri)
6 tortilla 12 modfedd wedi’u torri’n ddarnau triongl
3 cwpan o gaws cheddar wedi gratio
Yn ddibynnol ar yr hyn sy’n cymryd eich ffansi, fe allwch chi hefyd ychwanegu garlleg a chennin, er na wnes i dro hyn!
Coginio
Cynheswch y popty i 325°F.
Toddwch y menyn mewn sosban dros wres canolig.
Ychwanegwch bupur lliwgar a nionyn wedi’i dorri’n fân a’u coginio am 2-3 munud, neu nes eu bod yn dechrau meddalu.
Ychwanegwch gawl hufen cyw iâr, tomatos wedi’u deisio a tsili, a chyw iâr at y pupur a’r nionod, a’i gymysgu gyda’i gilydd.
Chwistrellwch eich dysgl gaserol gydag olew coginio.
Ychwanegwch 1/3 o stribedi tortilla i waelod y ddysgl, ac yna 1/3 o’r cymysgedd cyw iâr a chawl, ac 1 cwpan o gaws. Ailadroddwch hyn ddwywaith eto, gan orffen gyda chaws.
Pobwch heb ei orchuddio am 30-40 munud neu nes ei fod yn boeth ac yn ffrwtian.
Mwynhewch!
