Mae Casnewydd wedi codi i’r ail safle yn y tabl ar ôl curo Forest Green 3-1 ar Barc Spytty.
Roedd tîm Dean Holdsworth ar ei hôl hi wedi chwarter awr ar ôl i Yan Klukowski sgorio gydag ymdrech y tu fewn i’r cwrt cosbi.
Ond tair munud yn ddiweddarach, roedd Casnewydd wedi unioni’r sgôr gyda Sam Foley yn sgorio.
Fe aeth y tîm cartref ar y blaen wedi hanner awr gyda Craig Reid yn dod o hyd i gefn y rhwyd oddi ar bas Robbie Matthews.
Fe sgoriodd Reid ei ail gôl o’r gêm a’i nawfed o’r tymor gyda chwarter awr yn weddill.
Dyma bumed fuddugoliaeth yn olynol i Gasnewydd ac maen nhw’n ddiguro mewn 11 gêm.
Ar hyn o bryd mae Casnewydd un pwynt tu ôl i Fleetwood Town ar frig y tabl.
