Mae Heddlu Gogledd Cymru wedi apelio eto am wybodaeth am fachgen ifanc 15 mlwydd oed sydd wedi mynd ar goll yn ardal Llandudno.
Mae Duc Tuan Vo wedi bod ar goll ers dros wythnos bellach, ers iddo adael ei gartref yn ardal Craig-y-Don toc ar ôl 3pm ddydd Sul, 1 Awst.
Mae Duc Tan Vo yn dod o Fietnam ac mae o’n bum troedfedd chwe modfedd o daldra, ac yn denau o gorff. Mae ganddo lygaid brown a gwallt byr syth du.
Y tro diwethaf iddo gael ei weld roedd yn gwisgo hwdi llwyd, trowsus tracwisg glas ac esgidiau chwaraeon glas a gwyn.
Pryder
“Rydan ni’n pryderu mwy a mwy ynglŷn â diogelwch Duc. Dydi o ddim wedi cael ei weld ers gadael ei gartref. Mae’n fachgen o Fietnam a does ganddo ddim teulu a dim ond ychydig iawn o ffrindiau yn yr ardal,” meddai Martin Davies sy’n arwain ymchwiliad yr heddlu.
“Rydan ni’n annog Duc i ddod i gyswllt gyda ni ac i adael i ni wybod ei fod yn ddiogel,” meddai cyn dweud eu bod nhw hefyd yn awyddus i siarad ag unrhyw un arall sydd wedi gweld y bachgen neu a fedr helpu dod o hyd iddo.
Fe ddylai unrhyw un â gwybodaeth gysylltu gyda Heddlu Gogledd Cymru ar 101 neu 0845 6071001.
