Mae chwaraewr y Seintiau Newydd, Craig Jones wedi dweud eu bod nhw’n benderfynol o faeddu Anderlechr yng ngêm ragbrofol Cynghrair y Pencampwyr heno.
Mae pencampwyr Uwch Gynghrair Cymru 3-1 ar ei hôl hi i gawr pêl droed Gwlad Belg wedi’r cymal cyntaf, ac maen ganddyn nhw dasg anodd iawn o’u blaenau nhw er mwyn ennill lle yn rownd nesaf prif gystadleuaeth Ewrop.
“Fe fyddwn ni’n gwneud ein gorau i sicrhau nad ydan ni’n difaru ar ôl y gêm,” meddai Jones.
“Mae Anderlecht wedi profi pa mor dda ydyn nhw. Mae nhw wedi ennill eu cynghrair 30 o weithiau ac wedi chwarae yng Nghynghrair y Pencampwyr ar sawl achlysur.
“Ond dydan ni ddim allan ohoni eto. Fe allwn ni sgorio goliau yng Ngwlad Belg.”
Hyd yn oed pe bai’r Seintiau Newydd yn colli heno, fe fydden nhw’n cael chwarae yn rownd ragbrofol nesaf Cynghrair Europa.
