Kofi Annan
Mae Kofi Annan wedi rhoi’r gorau i’w rol fel Llysgennad arbennig y Cenhedloedd Unedig yn Syria.
Fe gyhoeddodd Ysgrifennydd Cyffredinol y Cenhedloedd Unedig, Ban Ki-moon, nad oedd Kofi Annan am barhau yn ei swydd sy’n dod i ben ar ddiwedd y mis.
Roedd Kofi Annan yn gyfrifol am lunio cynllun heddwch ar gyfer Syria er mwyn ceisio dod â’r trais yno i ben.
Ond nid oedd y naill ochr wedi cadw at y cynllun heddwch ac mae’r tywallt gwaed yno wedi parhau.
Dywedodd Ban Ki-moon bod Kofi Annan yn haeddu “ein hedmygedd” am geisio mynd i’r afael â thasg mor anodd.
Ychwanegodd ei fod yn cynnal trafodaethau gyda’r Cynghrair Arabaidd er mwyn dod o hyd i olynydd i barhau â’r gwaith o geisio dod â heddwch i’r wlad.
Beirniadu’r Cyngor Diogelwch
Mewn cynhadledd i’r wasg yn Genefa prynhawn ma, roedd Kofi Annan yn hynod feirniadol o fethiant y Cyngor Diogelwch i gytuno ar fesurau i ddod â’r trais i ben. Mae Rwsia a Tsieina wedi gwrthod ymuno â’r UDA, Prydain a Ffrainc yn eu condemniad o lwyodraeth Syria. Dywedodd Kofi Annan nad oedd wedi cael digon o gefnogaeth gan y Cyngor Diogelwch yn ei rol.
Amcangyfrifir bod 20,000 o bobl wedi eu lladd ers i brotestiadau gan wrthryfelwyr sy’n gwrthwynebu llywodraeth yr Arlywydd Bashar Assad ddechrau ym mis Mawrth y llynedd. Mae degau o filoedd o bobl wedi ffoi o’r wlad.
