Mae pryderon fod miloedd o eirth coala wedi cael eu lladd mewn tanau gwyllt yn Awstralia, mewn ardal i’r gogledd o Sydney sy’n gynefin pwysig i’r anifeiliaid.
Roedd arfordir talaith De Cymru Newydd yn gartref i hyd at 28,000 o coalas, ond mae’r tanau dros y misoedd diwethaf wedi lleihau eu poblogaeth yn sylweddol.
Mae’r anifeiliaid cynhenid a phoblogaidd hyn o dan fygythiad yn sgil colli cynefinoedd.
“Mae hyd at 30% o’u cynefin wedi cael ei ddinistrio,” meddai Sussan Ley, Gweinidog Amgylchedd y wlad.
“Fe fyddwn ni’n gwybod mwy ar ôl i’r tanau dawelu pan allwn ni wneud asesiad manwl.”
Mae tua 12.35 miliwn o erwau o dir wedi llosgi ledled y wlad yn ystod yr argyfwng tanau gwyllt presennol, gyda naw o bobl wedi cael eu lladd a mwy na 1,000 o gartrefi wedi eu dinistrio.
Mae rhybuddion o beryglon difrifol o dân yn dal mewn grym ledled talaith De Cymru Newydd a Thiriogaeth Prifddinas Awstralia.
