Mae rhagor o ffoaduriaid wedi cael eu hachub ar ôl ceisio croesi’r Sianel o Calais i Dover.
Cawson nhw eu gweld fore heddiw (dydd Llun, Medi 16) yn cael eu cludo i’r lan gan yr awdurdodau.
Mae lle i gredu mai grŵp o 12 o bobol oedden nhw, a’r mwyafrif yn ddynion.
Cawson nhw eu cludo oddi yno mewn fan gan swyddogion mewnfudo.
Mewn digwyddiad arall, cafodd naw o ffoaduriaid, gan gynnwys dynes a dau o blant, eu hachub gan awdurdodau Ffrainc am oddeutu 5 o’r gloch y bore pan aeth eu cwch i drafferthion.
Maen nhw bellach yng ngofal yr awdurdodau yn Boulogne.
Am oddeutu 4.30yb, cafodd wyth dyn, dynes a dau o blant eu hachub ar ôl cael eu darganfod ar gwch.
Maen nhw’n dweud eu bod nhw’n dod o Irac ac Iran.
Daw’r tri digwyddiad ar ôl sawl digwyddiad tebyg dros y penwythnos.
Cafodd dau ddyn, o Iran ac Affganistan, eu hachub ar ôl ceisio cyrraedd y lan mewn caiac.
A chafodd cwch yn cludo 24 o ffoaduriaid ei gipio gan yr awdurdodau, a chafwyd hyd i gwch arall yn cludo chwech o bobol.
Roedd trydydd cwch yn cludo saith dyn a dwy ddynes. Mae lle i gredu eu bod nhw’n dod o Iran, Affganistan, Twrci a Mali.
Mae’r holl ffoaduriaid bellach yng ngofal yr awdurdodau.
Rhybudd am ragor o achosion
Mae rhybudd gan yr awdurdodau fod nifer y ffoaduriaid sy’n ceisio cyrraedd y lan yn Ewrop ar gynnydd.
Cafodd o leiaf 86 o bobol eu hachub ar Fedi 10, gyda rhai yn llwyddo i gyrraedd y traeth cyn cael eu dal gan yr awdurdodau.
Ac mae lle i gredu bod disgwyl rhagor o achosion wrth i gampfa yn Dunkirk gau.
Mae hyd at 1,000 o ffoaduriaid yn y gampfa honno, ac mae pryderon y gallen nhw gael eu gorfodi i geisio cyrraedd y lan mewn gwlad arall.
Mae’r heddlu wedi bod yn ceisio symud nifer o ffoaduriaid i ffwrdd o wersyll ger Calais, gan ddefnyddio nwy ddagrau i’w tawelu.
Mae nifer o bobol wedi cael eu harestio’n ddiweddar ar amheuaeth o smyglo pobol.
Mae Llywodraeth Prydain wrthi’n llunio cynllun gweithredu er mwyn mynd i’r afael â’r sefyllfa.
