Dau o’r Llu Awyr wedi’u lladd yn Afghanistan

Mae dau aelod o’r Llu Awyr ymhlith pump o bobl gafodd eu lladd mewn damwain hofrennydd yn Afghanistan, meddai’r Weinyddiaeth Amddiffyn.

Bu farw’r ddau ar ôl i’w hofrennydd Puma Mk2 fynd i drafferthion wrth lanio ym mhencadlys hyfforddiant Nato yn Kabul, prifddinas Afghanistan.

Cafodd pump o bobl eraill hefyd eu hanafu yn y ddamwain bnawn dydd Sul.

Mae’r Weinyddiaeth Amddiffyn wedi mynnu mai “damwain” oedd y digwyddiad.

Dywedodd llefarydd: “Mae ymchwiliad ar y gweill i’r digwyddiad ond fe allwn gadarnhau mai damwain oedd y digwyddiad ac nid o ganlyniad i weithredoedd gwrthryfelwyr.

“Mae teuluoedd y ddau aelod o staff gafodd eu lladd wedi cael eu hysbysu ac wedi gofyn am oedi cyn ein bod yn cyhoeddi eu henwau.”

Roedd y ddau aelod yn gweithio yn safle’r Llu Awyr yn RAF Benson, rhwng Rhydychen a Reading. Nid oes unrhyw fanylion eraill wedi cael eu rhyddhau hyd yn hyn.

Mae pencadlys Nato, Resolute Support, yn Kabul, yn rhan o ymgyrch i roi hyfforddiant a chymorth i luoedd diogelwch a sefydliadau yn Afghanistan.

Dywed y Weinyddiaeth Amddiffyn bod tua 500 o filwyr o Brydain yn parhau yn Afghanistan fel rhan o’r ymgyrch.

Roedd y pump o bobl gafodd eu lladd yn y ddamwain yn aelodau o staff Resolute Support.