Phil Hughes
Mae’r batiwr o Awstralia, Phil Hughes wedi marw, deuddydd wedi iddo gael ei daro yn ei ben gan bêl yn ystod gêm.
Syrthiodd Hughes, 25, yn anymwybodol wrth lain y Sydney Cricket Ground tra’n batio i dîm De Awstralia yn erbyn New South Wales yng nghystadleuaeth y Sheffield Shield.
Cafodd y batiwr ei daro yn ei ben wrth iddo geisio taro bownsar gafodd ei fowlio gan Sean Abott.
Cafodd driniaeth frys cyn cael ei gysylltu i beiriant cynnal bywyd.
Ond cyhoeddwyd heddiw ei fod wedi marw yn Ysbyty St Vincent’s gyda’i deulu a ffrindiau agos o’i gwmpas.
Mae llu o deyrngedau gan gricedwyr a chefnogwyr wedi cael eu rhoi ar wefannau cymdeithasol.
Fe fydd munud o dawelwch cyn ail ddiwrnod y gêm brawf rhwng Pacistan a Seland Newydd yn Sharjah heddiw er cof amdano.
Fe fyddai Hughes wedi dathlu ei ben-blwydd yn 26 ddydd Sul.
