Jerwsalem
Mae addolwyr Iddewig wedi dychwelyd i synagog yn Jerwsalem lle cafodd pedwar o bobol eu lladd yn dilyn ymosodiad ddoe.
Cafodd tri Americanwr ac un Prydeiniwr eu lladd yn yr ymosodiad gan ddau ddyn o Balesteina yn ardal Har Nof yn ystod gweddïau’r bore.
Bu farw plismon o’i anafiadau’n ddiweddarach.
Cafodd pump o bobol eraill eu hanafu.
Cafodd y ddau ddyn eu saethu’n farw gan yr heddlu.
Ymatebodd y Prif Weinidog, Benjamin Netanyahu drwy ddweud bod yr ymosodiad yn “lofruddiaeth greulon o Iddewon oedd wedi dod i weddïo”.
Dywedodd ei fod yn gweld bai ar y grŵp Hamas ac Arlywydd Palesteina, Mahmoud Abbas am ddylanwadu ar y brawychwyr.
Ond am y tro cyntaf ers peth amser, cafodd yr ymosodiad ei feirniadu gan Abbas.
Yn y cyfamser, mae swyddogion diogelwch yn Israel wedi chwalu cartref dyn o Balesteina oedd wedi lladd dau o bobol ar blatfform trenau yn Jerwsalem ym mis Hydref.
Dywedodd Netanyahu y byddai Israel yn gweithredu’n llym yn erbyn ymosodiadau o’r fath.
