Claf Ebola yn cyrraedd yn ôl ym Mhrydain

Y firws Ebola
Cafodd nyrs o Brydain a ddaliodd yr haint marwol Ebola yn Sierra Leone ei gludo’n ôl i Lundain gan yr RAF neithiwr.

Mae William Pooley, 29 oed, bellach yn cael ei drin mewn ysbyty arbenigol yn Hampstead.

Er bod cyfraddau marwolaeth Ebola hyd at 90%, dywed Adran Iechyd Lloegr nad yw’n “ddifrifol o wael” a bod y risg i’r haint ledaenu ym Mhrydain yn “isel iawn”.

Barn gwyddonwyr yw bod ganddo obaith da o wella gan i’r haint gael ei ddal yn ddigon cynnar.

Dywed Sefydliad Iechyd y Byd (WHO) bod 2,615 o bobl wedi cael eu heintio â’r firws marwol, a bod tua 1,427 wedi marw ers i’r achosion presennol gael eu darganfod yn Guinea ym mis Mawrth. Ers hynny, mae’r haint wedi lledaenu i Sierra Leone, Liberia a Nigeria.

Mae’r Swyddfa Dramor yn pwyso ar i bobl ystyried yn ddwys cyn teithio i’r tair gwlad hyn.