Y Stadiwm Olympaidd
Mae trefnwyr Gemau Olympaidd Llundain wedi gwrthod dweud a ydyn nhw’n ystyried y bencampwriaeth yn llwyddiant ai peidio.
Dywedodd y trefnwyr Locog mai sylwebwyr y tu allan fyddai yn penderfynu os mai Llundain 2012 oedd y ‘Gemau gorau erioed’.
Mae Gemau Olympaidd Sydney yn 2000 a Gemau Olympaidd Beijing 2008 yn cael eu hystyried ymysg y goreuon ar hyn o bryd.
“Mae’r athletwyr yn hapus, mae’r cymdeithasau rhyngwladol yn hapus. Bydd rhaid i bobol eraill benderfynu lle ydyn ni’n sefyll,” meddai cadeirydd Locog, yr Arglwydd Coe.
“Ond rydw i’n hapus iawn â sut y mae pethau wedi mynd. Ond dydyn ni ddim wedi croesi’r llinell derfyn eto.”
Roedd pryderon mawr am broblem trafnidiaeth, streicio, a seddi gwag ar ddechrau’r gemau, ond fe gafodd pob un ei ddatrys heb ormod o ffwdan.
Pryder arall a fydd yn cael ei drafod yn dilyn y gemau fydd y prinder twristiaid yng nghanol dinas Llundain.
Roedd siopau, gwestai a bwytai canol Llundain yn wag, wrth i’r twristiaid dyrru i safle’r Gemau ychydig filltiroedd i’r dwyrain, yn ôl Cymdeithas Trefnwyr Teithiau Ewrop.
Dywedodd y gymdeithas fod pen gorllewinol y ddinas, sydd fel arfer yn hynod o brysur, yn “annaearol o wag”.
Roedd Llundain yn denu tua 300,000 o dwristiaid o dramor, a 800,000 o weddill y Deyrnas Unedig, bob blwyddyn, meddai’r Prif Weithredwr, Tom Jenkins.
“Mae’n amlwg bod y bobol yma wedi cael y neges y dylen nhw gadw draw ac wedi gwneud hynny,” meddai.
