Coronavirus: tâl statudol ar ddiwrnod cyntaf absenoldeb gweithwyr

Fe fydd gweithwyr yn gallu hawlio tâl statudol ar ddiwrnod cyntaf absenoldeb o’r gwaith yn sgil coronavirus.

Daeth cadarnhad o’r ddeddfwriaeth frys gan Boris Johnson, prif weinidog Prydain, fel rhan o ymateb y llywodraeth i’r sefyllfa.

 

Mae’n galw ar bobol i barhau i ynysu eu hunain, gan fod hynny’n “helpu i’n gwarchod ni i gyd drwy arafu lledu’r firws”.

 

“Os ydyn nhw’n aros adref a’n bod ni’n gofyn i bobol ynysu eu hunain, mae’n bosib y byddan nhw’n colli allan yn ariannol,” meddai wrth aelodau seneddol.

 

“Felly gallaf gyhoeddi heddiw (dydd Mercher, Mawrth 4) y bydd yr Ysgrifennydd Iechyd [Matt Hancock] yn cyflwyno mesurau, fel rhan o’n deddfwriaeth frys ar coronavirus, er mwyn awdurdodi tâl salwch statudol o’r diwrnod cyntaf un y byddwch chi’n sâl, yn hytrach na phedwar diwrnod y rheolau presennol, a dw i’n credu mai dyna’r ffordd orau ymlaen.

 

“Ddylai neb orfod cael eu cosbi am wneud y peth iawn.”