Mae nifer yn darogan senedd grog yn un o’r etholiadau pwysicaf ers tro yn San Steffan, ac mae’r Democratiaid Rhyddfrydol yn gobeithio sicrhau mwy o seddi gyda Brexit yn brif bwnc trafod yr etholiad.
“Mae gyda ni’r cyfle o hyd i atal Boris Johnson rhag sicrhau mwyafrif er mwyn gorfodi ei fargen Brexit drwodd, gyda’r posibilrwydd cryf y gallen ni fod allan o’r Undeb Ewropeaidd heb fargen o gwbl mewn ychydig dros flwyddyn,” meddai wrth raglen Sophy Ridge on Sunday ar Sky News.
“Felly bydd y dyddiau nesaf yn gwbl hanfodol wrth i bobol benderfynu mewn seddi ymylol ar hyd a lled y wlad.”
Mae’n dweud bod y cyfnod ymgyrchu wedi gweld Boris Johnson a Nigel Farage, arweinydd Plaid Brexit, yn closio, a bod angen gweithio tuag at y nod o atal Brexit.
“Fe fyddwn ni’n sicr yn gweithio er mwyn atal Brexit, a gwneud hynny mewn modd cydweithredol ag eraill sy’n rhannu ein gwerthoedd a’n nod.”
