Mae’r cwmni oedd yn gyfrifol am adeiladu bysus Llundain pan oedd Boris Johnson yn faer, yn nwylo’r gweinyddwyr.
Mae lle i gredu bod cwmni Wrightbus yn cyflogi hyd at 1,500 o weithwyr, a’i fod yn un o brif gyflogwyr Gogledd Iwerddon.
Daeth cadarnhad gan yr aelod seneddol Ian Paisley y byddai’r broses weinyddu’n dechrau heddiw (dydd Mercher, Medi 25), a bod cyfarfodydd undebau ar y gweill.
‘Bysus Boris’
Pan oedd Boris Johnson yn Faer Llundain, cafodd y bysus, oedd yn cael eu hadnabod fel ‘bysus Boris’, eu beirniadu am fod yn rhy ddrud.
Mae lle i gredu bod yr wyth bws cyntaf wedi costio £1.4m yr un i’w dylunio a’u hadeiladu.
Roedd rhai hefyd yn cwyno eu bod yn rhy boeth, ac fe fu’n rhaid addasu’r bysus a ddaeth wedyn fel bod mwy o ffenestri ynddyn nhw.
Mae William Wright, sylfaenydd y cwmni, yn gefnogwr o blaid y DUP, ac yn frwd dros Brexit.
Ond hwn yw’r cwmni diweddaraf i wynebu trafferthion wrth i Brydain baratoi i adael yr Undeb Ewropeaidd.
