Mae Prif Weinidog Prydain, Theresa May wedi cyhuddo’r cyn-Brif Weinidog Llafur, Tony Blair o “danseilio” y trafodaethau Brexit drwy alw am ail refferendwm.
Dywedodd y byddai cynnal refferendwm newydd yn golygu bod y senedd yn ymbellhau oddi wrth ei chyfrifoldeb.
“Mae gan y Senedd ddyletswydd ddemocrataidd i gyflwyno’r hyn y gwnaeth pobol Prydain bleidleisio i’w gael,” meddai.
“Rwy’n benderfynol o hyd o weld hynny’n digwydd. Wna i ddim siomi pobol Prydain.”
Yr unig ffordd allan?
Mae Tony Blair yn awgrymu y gallai aelodau seneddol benderfynu mai cynnal ail refferendwm yw’r unig ffordd o sicrhau cytundeb yn dilyn y trafodaethau gyda Brwsel.
Ond mae Theresa May yn dweud bod rhai beirniaid yn ceisio manteisio ar y sefyllfa at eu dibenion eu hunain.
“Rwy’n brwydro am gytundeb da i Brydain,” meddai.
“Fe wna i barhau i frwydro am gytundeb da i Brydain.
“Dw i erioed wedi colli golwg o fy nyletswydd, sef cyflwyno ar sail canlyniad y refferendwm, a gwneud hynny mewn modd sy’n amddiffyn swyddi Prydeinig, ein cadw ni’n ddiogel ac sy’n amddiffyn ein Hundeb.
“Fodd bynnag, mae yna ormod o bobol sy’n ceisio manteisio ar y sefyllfa er eu buddiannau gwleidyddol eu hunain – yn hytrach na gweithredu er lles y genedl.”
