Abdullah Hayayei o’r Emiradau Arabaidd Unedig (Llun: Gwefan Pencampwriaethau Para-athletau’r Byd/Getty Images)
Fe fu farw para-athletwr o’r Emiradau Arabaidd Unedig ar ôl i gawell y ddisgen gwympo ar ei ben.
Roedd Abdullah Hayayei yn ymarfer yng nghanolfan hamdden Newham yn Llundain yn barod ar gyfer Pencampwriaethau Para-athletau’r Byd pan gafodd ei ladd.
Roedd disgwyl iddo fe gynrychioli ei wlad yn y ddisgen, y siot a’r gwaywffon yn nosbarth F34, wrth i’r cystadlu ddechrau yn y Stadiwm Olympaidd yn Llundain ddydd Gwener.
Cafodd cynhadledd i’r wasg ei chynnal heddiw, ond ni chafodd y manylion eu cyhoeddi bryd hynny oherwydd bod yr heddlu’n dal i ymchwilio i’r digwyddiad.
Ond mae llywydd Pwyllgor Paralympaidd Asia, Majid Rashed bellach wedi cadarnhau sut y bu farw.
Dywedodd fod y gawell wedi glanio ar ben Abdullah Hayayei, a bod nifer o hyfforddwyr a phara-athletwyr wedi gweld y digwyddiad.
Roedd yn dad i bump o blant.
Roedd dyfalu y gallai’r gemau gael eu gohirio o ganlyniad, ond fe fyddan nhw’n mynd yn eu blaen, a bydd tîm yr Emiradau Arabaidd Unedig yn cystadlu.
Mae’r ganolfan hamdden ynghau o hyd.
Fe fydd munud o dawelwch yn cael ei gynnal yn ystod seremoni agoriadol y Pencampwriaethau ddydd Gwener, a bydd rhagor o deyrngedau iddo maes o law.
