Mae’r ffilm The Revenant wedi ennill tair o brif wobrau’r Baftas eleni gan gynnwys tlws yr actor gorau i Leonardo DiCaprio.

Enillodd y ffilm y wobr am y ffilm orau a derbyniodd Alejandro Gonzalez Inarritu y tlws am y cyfarwyddwr gorau. Aeth y ffilm ymlaen i ennill Baftas am sinematograffi a sain yn ogystal.

Dywedodd Leonardo DiCaprio, 41, sy’n gobeithio ennill ei Oscar cyntaf yn ddiweddarach y mis hwn, bod ennill y wobr yn “sioc ac yn anrhydedd”.

Roedd wedi cael ei enwebu ochr yn ochr ag enillydd y llynedd Eddie Redmayne, a gafodd enwebiad am The Danish Girl, yn ogystal â Michael Fassbender, Matt Damon a Bryan Cranston.

Dywedodd cyfarwyddwr  The Revenant, Alejandro Gonzalez  Inarritu, a enillodd yr Oscar am y cyfarwyddwr gorau am Birdman yn 2015, fod ennill y Bafta yn “wir anrhydedd”.

Gwobrau eraill

Enillodd Brie Larson wobr yr actores orau am ei rôl yn y ddrama glawstroffobig The Room.

Enillodd Kate Winslet y wobr am yr actores gynorthwyol orau am ei pherfformiad yn y ffilm fywgraffyddol am Steve Jobs, cyd-sylfaenydd cwmni cyfrifadurol Apple.

Mark Rylance enillodd y wobr am yr actor cynorthwyol gorau am ei rôl fel ysbïwr Rwsiaidd yn Bridge Of Spies.

Brooklyn, y ddrama am fewnfudwr Gwyddelig i America enillodd wobr y ffilm Brydeinig ragorol, tra aeth Amy, y ffilm am y gantores Amy Winehouse, a’r tlws am y ffilm ddogfennol orau.

Mad Max: Fury Road enillodd y Baftas am olygu, colur a gwallt, dylunio gwisgoedd a dylunio cynhyrchu tra bod y wobr am y gerddoriaeth wreiddiol orau wedi mynd i Ennio Morricone am The Hateful Eight.

Y ffilm Star Wars ddiweddaraf enillodd y Bafta am yr effeithiau gweledol arbennig gorau.

Cyfraniad eithriadol cwmni gwisgoedd

Aeth y wobr am gyfraniad eithriadol i sinema Brydeinig i gwmni gwisgoedd sydd wedi darparu dillad ar gyfer rhai o’r ffilmiau mwyaf llwyddiannus yn hanes ffilm gan gynnwys Star Wars, Titanic a Lawrence Of Arabia.

Cafodd Angels Costumes ei sefydlu yn 1840 ac mae’r cwmni wedi gweithio gyda’r diwydiant ffilm am fwy na chanrif.

Cafodd y seremoni ei chyflwyno gan Stephen Fry a chafodd ei chynnal yn y Tŷ Opera yn Covent Garden yn Llundain.