Dave Lee Travis
Mae cyn-gyflwynydd Radio 1 wedi colli her yn erbyn dyfarniad o ymosod yn anweddus ar ferch.
Yn y Llys Apêl yn Llundain, fe wrthododd tri barnwr gais Dave Lee Travis i wyrdroi’r dyfarniad.
Cafwyd y cyn-gyflwynydd yn euog y llynedd o gyffwrdd ymchwilydd ifanc y tu ôl i’r llenni yn ystod y rhaglen The Mrs Merton Show yn 1995.
Yn dilyn y dyfarniad, fe ddywedodd y cyn-gyflwynydd, 70 oed, a arferai gyflwyno Top of the Pops, ei fod yn teimlo “cywilydd” ac yn “siomedig iawn”.
Cafodd ei ddedfrydu i dri mis o garchar, wedi’i ohirio am ddwy flynedd, gan farnwr yn Llys y Goron Southwark, Llundain.
Roedd Travis yn bresennol yn y llys heddiw pan gafodd y penderfyniad i wrthod ei gais i apelio ei gyhoeddi. Fe benderfynodd tri barnwr nad oedd sail ddigonol i gynnal apêl.
‘Dinistrio ei yrfa’
Cafodd Dave Lee Travis, o Aylesbury, Swydd Buckingham ei arestio ym mis Hydref 2012 fel rhan o Operation Yewtree, ymchwiliad Scotland Yard i achosion hanesyddol o gam-drin rhywiol yn sgil honiadau yn erbyn y diweddar Jimmy Savile.
Fe glywodd y rheithgor ei fod wedi ymosod ar yr ymchwilydd ar un o goridorau stiwdios y BBC lle’r oedd hi’n ysmygu ar y pryd.
Clywodd y llys ei fod wedi gwneud sylwadau am “ei hysgyfaint truenus” ac wedi gwasgu ei bronnau am 10 i 15 eiliad.
Fe ddywedodd ei gyfreithiwr Stephen Vullo QC, fod y digwyddiadau yn dilyn arestio Dave Lee Travis wedi “dinistrio ei yrfa, a’i enw da ac wedi niweidio ei gynilion y tu hwnt i’w hadfer.”
‘Taflu baw’
Y tu allan i’r llys heddiw fe ddywedodd Dave Lee Travis: “Wrth gwrs, dw i wir, wir yn siomedig – sydd siŵr o fod yn dan-osodiad y ganrif.”
“Rwy’n siŵr y bydd yr Heddlu Metropolitan yn teimlo rhyddhad heddiw,” ychwanegodd.
“Fe lwyddon nhw, ynghyd a Gwasanaeth Erlyn y Goron, i daflu mwy o faw ata’ i dros y tair blynedd ddiwethaf na allai neb ei ddychmygu,” meddai.
Fe ddywedodd na allai dderbyn y canlyniad a’i fod yn “cytuno gyda’r gyfraith, ond dw i wedi colli llawer o barch at y gyfraith nawr.”
