Dylid creu deddfwriaeth newydd sy’n cyfyngu ar rym Arglwyddi, yn ôl y cyn-Ganghellor Ceidwadol, Ken Clarke.
Daw ei sylwadau wedi i Lywodraeth Prydain golli pleidlais tros gredydau treth yn Nhŷ’r Arglwyddi’r wythnos diwethaf.
Dylai Aelodau Seneddol gael y gair olaf ar faterion ariannol, gan gynnwys trethi a gwariant, meddai, gan alw ar yr Arglwydd Strathclyde i weithredu hynny.
Cafodd yr Arglwydd Strathclyde ei benodi gan Brif Weinidog Prydain, David Cameron i arwain adolygiad o rym yr Arglwyddi’n dilyn y bleidlais.
Mae e eisoes wedi awgrymu y gellid newid deddfau seneddol, ond fe ddywedodd mai ateb “eithafol” fyddai hynny.
Mae Ken Clarke wedi cyhuddo’r Blaid Lafur a’r Democratiaid Rhyddfrydol o fanteisio ar eu mwyafrif yn Nhŷ’r Arglwyddi er mwyn rhwystro’r toriadau i gredydau treth.
Dywedodd wrth Sky News fod angen “Llywodraeth sy’n gallu gwneud pethau”.
“Dydych chi ddim am gael sefyllfa Americanaidd. Mae’r Eidalwyr hyd yn oed wedi lleihau grym eu senedd i flocio Tŷ’r Cyffredin, oherwydd rydyn ni i gyd yn gwybod fod rhaid i Lywodraeth wneud pethau anodd weithiau.”
Ychwanegodd fod rhaid i Lywodraeth fod yn atebol, ac mai trwy reoli ei pholisi economaidd ei hun y mae sicrhau hynny.
Mae cyn-arweinydd y Democratiaid Rhyddfrydol, yr Arglwydd Ashdown wedi cyhuddo Ken Clarke o fod yn “ddrwg iawn” drwy greu cam-argraff o’r sefyllfa.
