Mae’r hyn sydd wedi’i gynnig eisoes yn annigonol o safbwynt Llywodraeth Prydain, a bydd y prif weinidog Boris Johnson yn cynnal trafodaeth unwaith eto ag Ursula von der Leyen, Llywydd Comisiwn Ewrop, cyn diwedd y dydd.
Mae disgwyl i swyddi gael eu colli ac i brisiau bwyd godi pe na bai modd taro bargen ynghylch meysydd sy’n cynnwys pysgodfeydd.
Er bod gwahaniaethau rhwng y ddwy ochr o hyd, mae swyddogion yn dal i fynnu bod Boris Johnson yn benderfynol o daro bargen er mwyn sicrhau bod modd masnachu’n rhydd.
Ymateb Llywodraeth Prydain
“Mae’r trafodaethau’n parhau dros nos ond fel mae pethau’n sefyll, mae’r cynnig ar y bwrdd gan yr Undeb Ewropeaidd yn dal yn annerbyniol,” meddai un ffynhonnell o fewn Llywodraeth Prydain.
“Bydd y prif weinidog yn drylwyr iawn yn y broses hon, ond mae’n gwbl glir: rhaid i unrhyw gytundeb fod yn deg a pharchu’r safbwynt y bydd y Deyrnas Unedig yn genedl sofran ymhen tair blynedd.”
Mae disgwyl i Boris Johnson gynnal cynhadledd neu recordio datganiad ar ôl siarad â phrif swyddog Ewrop.
Ond mae’r Ceidwadwyr ac Ursula von der Leyen yn rhybuddio bod ymadawiad heb gytundeb yn fwy tebygol na dod i gytundeb.
Beth nesaf?
Yn sgil y tebygolrwydd o adael heb gytundeb, mae Llywodraeth Prydain yn paratoi i adael y farchnad sengl ar ddiwedd y cyfnod pontio ar Ragfyr 31.
Mae Boris Johnson yn arwain pwyllgor ‘XO’ i oruchwylio’r paratoadau wrth i weinidogion sicrhau bod modd i gyflenwadau bwyd a meddyginiaethau a nwyddau eraill gyrraedd gwledydd Prydain tan y flwyddyn nesaf.
Ond mae Conffederasiwn Diwydiannau Prydain yn galw am gytuno ar gyfnod o ymgyfarwyddo i fusnesau os na fydd modd taro bargen fel nad ydyn nhw “ar ymyl y dibyn”.
Mae Llywodraeth Prydain eisoes yn dweud eu bod nhw’n paratoi llongau i warchod eu dyfroedd rhag ofn bod gwledydd yn pysgota’n anghyfreithlon, ac mae hynny wedi cythruddo rhai Ceidwadwyr.
Ac mae adroddiadau bod Llywodraeth Prydain hefyd yn paratoi i roi mwy o bwerau i’r Llynges fel bod modd iddyn nhw fynd ar longau ac arestio pysgotwyr sy’n torri rheolau ôl-Brexit.
Mae Brwsel eisiau i’r trefniadau presennol barhau am 12 mis pe bai Prydain yn gadael heb gytundeb, ond mae lle i gredu bod Llywodraeth Prydain wedi wfftio hynny.
.jpg){kind=link}