Mae cwmni telathrebu BT yn wynebu’r streic genedlaethol gyntaf mewn mwy na chwarter canrif yn sgil anghydfod ynghylch nifer o faterion yn ymwneud â swyddi, cyflog ac amodau.
Cyhoeddodd Undeb y Gweithwyr Cyfathrebu (CWU) ei fod yn cynnal pleidlais ymgynghorol ymhlith ei haelodau a allai arwain at bleidlais ynghylch cymryd camau diwydiannol.
Dywedodd yr undeb ei bod yn ystyried mynd ar streic oherwydd gweithredoedd “cynyddol ymosodol” gan y rheolwyr.
Bydd y pleidleisio’n dechrau yn ddiweddarach y mis hwn ac yn cau ar Ragfyr 10.
Rhybuddiodd swyddogion CWU, os na fydd cynnydd mewn trafodaethau gyda’r cwmni, fod “posibilrwydd gwirioneddol” o bleidlais o blaid gweithredu diwydiannol, a dywedodd y gallai arwain at y streic genedlaethol gyntaf yn BT ers 1994.
“Elw o flaen pobol”
Dywedodd ysgrifennydd cyffredinol CWU, Dave Ward: “Dyma’r bleidlais bwysicaf mae ein haelodau wedi gorfod ei bwrw ers ymuno â’r cwmni
“Mae hyn yn ymwneud â diogelwch swyddi, cyflog, hawliau gweithwyr, a chyfeiriad y cwmni yn y dyfodol.
“Ar ôl degawdau o sefydlogrwydd diwydiannol, rydym bellach yn gweld BT yn cychwyn ar raglen filain o ddiswyddiadau gorfodol, cau safleoedd ac ymosodiadau ar gyflogau, telerau ac amodau.
“Maen nhw’n rhoi elw o flaen pobol.
“Os gadawn i’r cwmni gyflawni’r newidiadau hyn heb wrthwynebiad difrifol, yna bydd y llifddorau’n agor.”
BT yn ofni “disgyn ar ei hôl hi”
Dywedodd llefarydd ar ran BT: “Mae BT yn mynd drwy gyfnod o newid a buddsoddiad aruthrol ar gyfer y dyfodol.
“Wrth i’r farchnad barhau i esblygu ac i anghenion ein cwsmeriaid yn newid, bydd angen y sgiliau a’r galluoedd cywir arnom er mwyn addasu ac ymateb.
“Bydd hyn yn arwain at lai o bobol yn gweithio i’r cwmni ymhen pum mlynedd, ond byddwn yn blaenoriaethu darparu cyfleoedd ailhyfforddi, ailsgilio, ac adleoli lle y gallwn.
“Os nad ydym yn gwella ein cynhyrchiant a’n heffeithlonrwydd, bydd BT yn disgyn ar ei hôl hi mewn marchnadoedd hynod gystadleuol.”
