Mae’r pêl-droediwr Sergio Aguero wedi cael ei amddiffyn yn dilyn beirniadaeth am roi ei fraich ar ysgwydd dyfarnwr cynorthwyol benywaidd yn ystod gêm.
Fe ddigwyddodd yn ystod buddugoliaeth Manchester City o 1-0 dros Arsenal ddoe (dydd Sadwrn, Hydref 17).
Roedd e’n cwestiynu’r penderfyniad i roi tafliad yn ei erbyn e, ac fe gafodd ei weld yn dadlau â Sian Massey-Ellis cyn dechrau cerdded i ffwrdd a rhoi ei fraich am ei hysgwydd.
Dywedodd Micah Richards, dadansoddwr Sky Sports, y dylai ei gyn gyd-chwaraewr fod yn “gwybod yn well”.
Yn ôl y rheolau, gall chwaraewr gael ei gosbi gyda cherdyn melyn neu goch am gyffwrdd â swyddog.
Sylwadau’r rheolwr
Ond yn ystod cynhadledd i’r wasg, fe wnaeth Pep Guardiola, rheolwr Manchester City, amddiffyn y chwaraewr.
“Dewch ymlaen, bois,” meddai.
“Sergio yw’r person mwyaf hoffus wnes i gyfarfod yn fy myw.
“Edrychwch am broblemau mewn sefyllfaoedd eraill, nid yn yr un yma.”
