Llywodraethau datganoledig yn polio’n well na Llywodraeth San Steffan ymysg y cyhoedd… yn Lloegr

Mae arolwg barn YouGov a gynhaliwyd ar ran YesCymru yn dangos fod pobol yn Lloegr yn credu bod y Llywodraethau Datganoledig wedi delio gyda’r pandemig yn well na Llywodraeth Boris Johnson.

Roedd 41% yn teimlo bod Llywodraeth San Steffan wedi delio â’r argyfwng yn dda, tra bod 50% yn credu fod Llywodraeth Cymru wedi delio â’r argyfwng yn dda.

Yn ôl yr arbenigwr gwleidyddol, Dr Dafydd Trystan: “Mae’r canlyniadau o Loegr ar berfformiad cymharol pedair llywodraeth y Deyrnas Gyfunol yn eithaf rhyfeddol.

“Tra bod etholwyr yn cymryd golwg anffafriol ar agwedd Llywodraeth y Deyrnas Unedig tuag at Covid-19, mae eu barn am y Llywodraethau eraill yn llawer mwy ffafriol.

“Mae’r canlyniadau yn dangos bod pleidleiswyr Ceidwadol, Llafur a’r Democratiaid Rhyddfrydol fel ei gilydd yn gweld gwerth i record gadarnhaol y lywodraethu Celtaidd o’u cymharu â methiannau ymddangosiadol Boris Johnson yn Lloegr. ”

“Pobl yn Lloegr yn dechrau sylweddoli”

Disgrifiwyd y canlyniadau fel rhai “anhygoel” gan gadeirydd YesCymru, Siôn Jobbins.

“Mae’r niferoedd hyn yn anhygoel ac yn dangos bod pobol yn Lloegr bellach yn ymwybodol o ddatganoli mewn ffordd nad oeddent o’r blaen.

“Mae argyfwng Covid-19 wedi dangos yn glir y diffygion yn null ganolog San Steffan o lywodraethu ac mae’n bryd inni gael dadl o ddifri am ddyfodol yr undeb.

“Mae’r undeb yn siomi pobl Cymru, Lloegr, yr Alban a Gogledd Iwerddon ac mae pobl yn Lloegr yn dechrau sylweddoli hynny.”