Mae arweinydd newydd y Blaid Lafur, Jeremy Corbyn wedi hen ddechrau cyhoeddi enwau’r rhai fydd yn ei gabinet cysgodol.
Er bod Jeremy Corbyn wedi datgan eisoes y byddai ei gabinet cysgodol yn gyfuniad cyfartal o ddynion a menywod, dynion sydd wedi’u penodi i’r prif swyddi – y canghellor cysgodol, materion cartref, materion tramor a chyfiawnder.
Uchafbwyntiau eraill
Mae Yvette Cooper wedi derbyn cyfrifoldeb am arwain gweithgor ar faterion yn ymwneud â ffoaduriaid.
Mae Rosie Winterton yn parhau’n Brif Chwip cysgodol.
Mae rhai aelodau seneddol y blaid eisoes wedi dweud na fyddan nhw’n rhan o’r cabinet cysgodol newydd, sef Mary Creagh, Liz Kendall, Tristram Hunt, Rachel Reeves, Chris Leslie, Emma Reynolds a Jamie Reed.
Yr unig Gymro yn y cabinet cysgodol, fwy na thebyg, fydd Chris Bryant, fydd yn arweinydd cysgodol y Tŷ.
Mae adroddiadau mai Lucy Powell fydd yn gyfrifol am Addysg ac mai Michael Dugher fydd yn gyfrifol am y Cyfryngau, Diwylliant a Chwaraeon.
Dydy’r swyddi Amddiffyn, Gwaith a Phensiynau, Ynni, yr Amgylchedd, Cymunedau nac Ysgrifennydd Cymru ddim wedi cael eu cyhoeddi eto.
- Canghellor – John McDonnell
- Busnes – Angela Eagle (hefyd yn Brif Ysgrifennydd Gwladol)
- Y Trysorlys – Seema Malhotra
- Materion Cartref – Andy Burnham
- Materion Tramor – Hilary Benn
- Iechyd – Heidi Alexander
- Cyfiawnder – yr Arglwydd Falconer
- Datblygiad Rhyngwladol – Diane Abbott
- Yr Alban – Ian Murray
- Gogledd Iwerddon – Vernon Coaker
