Miliband yn ceisio ennill tir ar ôl rhaglenni teledu

Ed Miliband (PA)
David Cameron oedd wedi gwneud orau  yn rhaglenni teledu’r arweinyddion neithiwr, yn ôl arolwg barn cyflym yn union wedyn.

Fe gafodd arweinydd y Ceidwadwyr sgôr o 44% ar ôl y rhaglenni Prydeinig gydag arweinyddion y tair plaid fwya’.

Roedd Ed Miliband, yr arweinydd Llafur, ar 38% a’r Democrat Rhyddfrydol, Nick Clegg, ar 19%.

Miliband yng Nghaerdydd

Fe fydd Ed Miliband yn ceisio ennill tir yn ôl heddiw wrth ymosod ar genedlaetholdeb ac addo rhoi arian i gau’r bwlch i bobol sy’n diodde’ oherwydd y ‘dreth ar stafelloedd gwely’.

Fe fydd yn galw yng Nghaerdydd a’r Alban ar daith frys gan ddweud  mai arian i gywiro’r dreth fyddai ei gam cynta’ pe bai’n dod i rym.

Apêl i Lafurwyr yr Alban

Ond yn yr Alban, ar ôl gwrthod taro unrhyw fargen gyda phlaid genedlaethol yr SNP, fe fydd yn apelio ar bleidleiswyr Llafur yno i droi’n ôl at eu gwreiddiau.

Fe fydd yn codi enwau Albanwyr Llafur fel Keir Hardie, sylfaenydd y blaid, a’r ddau sy’n cael clod am ddatganoli, John Smith a Donald Dewar.

“Wnaeth cenedlaetholdeb erioed adeiladu ysgol neu godi pobol allan o dlodi,” yw un o’r dyfyniadau sydd wedi eu gollwng ymlaen llaw.