Osborne yn wynebu ‘cwestiynau difrifol’ am helynt HSBC

Y Canghellor George Osborne
Mae’r Canghellor George Osborne yn wynebu “cwestiynau difrifol” am fanc HSBC meddai’r Blaid Llafur.

Mae Ed Balls wedi cael caniatâd i ofyn cwestiwn brys yn Nhŷ’r Cyffredin heddiw wedi iddi ddod i’r amlwg fod prif weithredwr banc HSBC, Stuart Gulliver, wedi derbyn tâl a thaliadau bonws o £7.6miliwn y llynedd, er gwaethaf cwymp o 17% yn elw’r banc.

Nid oedd Stuart Gulliver wrth y llyw ar adeg yr honiadau bod HSBC yn y Swistir wedi helpu cwsmeriaid cyfoethog i osgoi talu trethi, ac fe gafodd  £500,000 yn llai o fonws y llynedd oherwydd methiannau rheoli yn ymwneud â dirwy a gafodd y banc am dwyll.

Ond dywedodd y Blaid Lafur y bydd maint y bonws mae Stuart Gulliver wedi derbyn yn “syfrdanu’r”  cyhoedd ac maen nhw’n galw am ddiwygiadau ehangach o’r diwydiant bancio.

Mae’r blaid hefyd wedi rhoi pwysau ar  George Osborne i ateb cwestiynau am beth oedd o’n ei wybod am helynt HSBC a phenderfyniad Llywodraeth y DU i wneud cyn bennaeth y banc, yr Arglwydd Green, yn weinidog.

Mae’r cwestiwn brys wedi cael ei roi gerbron y Canghellor, ond nid yw’r Trysorlys wedi cadarnhau pwy fydd yn ateb ar ran y Llywodraeth hyd yn hyn.