Mae’r Ysgrifennydd Cartref, Theresa May wedi colli ei hapêl yn erbyn penderfyniad i adael i’r clerigwr Abu Qatada aros ym Mhrydain.
Dywedodd cyfreithwyr ar ei rhan fod Qatada yn ddyn “gwirioneddol beryglus” oedd wedi osgoi cael ei alltudio oherwydd nifer o ffaeleddau cyfreithiol.
Penderfynodd y Comisiwn Apeliadau ym mis Tachwedd nad oedd modd alltudio Qatada i Wlad yr Iorddonen oherwydd ei fod mewn perygl o gael ei arteithio pe bai’n wynebu achos llys newydd yn y wlad.
Cafodd apêl Theresa May ei wrthod yn unfrydol.
Apêl arall
Dywedodd y Swyddfa Gartref mewn datganiad fod yr adran yn bwriadu cyflwyno apêl arall.
“Nid dyma ddiwedd y daith, ac mae’r Llywodraeth o hyd yn benderfynol o alltudio Abu Qatada.
“Byddwn ni’n ystyried y dyfarniad hwn yn ofalus ac rydym yn bwriadu ceisio am yr hawl i apelio.
“Yn y cyfamser rydym yn parhau i weithio gyda phobol yr Iorddonen i fynd i’r afael â’r materion cyfreithiol sy’n weddill sy’n atal y broses alltudio.”
