Mae Pwyllgor Plant, Pobol Ifanc ac Addysg y Senedd wedi galw am fwy o wybodaeth ynglŷn â’r strategaethau pontio sydd mewn lle rhwng gwasanaethau iechyd meddwl plant ac oedolion.

Mewn llythyr, sydd wedi ei gyfeirio at y Dirprwy Weinidog Iechyd Meddwl, Lynne Neagle, mae’r pwyllgor yn tynnu sylw at sesiwn yn ystod mis Rhagfyr 2022 a oedd yn ymwneud ag adroddiad Sortiwch y Switsh Mind Cymru.

Cododd yr adroddiad Sortiwch y Switsh awgrymiadau ynglŷn â sut i gynnig cefnogaeth i bobol ifanc wrth iddyn nhw symud oddi wrth wasanaethau iechyd meddwl plant ac oedolion.

Roedd y sesiwn yn ystod mis Rhagfyr, ble’r oedd Lynne Neale yn bresennol, yn gyfle i bobol ifanc a oedd yn ymwneud a’r adroddiad ofyn cwestiynau a rhannu eu profiadau.

Y prif fwriad oedd sicrhau profiadau gwell i bobol ifanc wrth iddyn nhw adael y Gwasanaethau Iechyd Meddwl Plant a’r Glasoed (CAMHS) a symud tuag at wasanaethau oedolion (AMHS).

Galw am ddiweddariadau

Mae’r llythyr, sydd wedi ei arwyddo gan gadeirydd y Pwyllgor, Jane Bryant, yn nodi:

“Gwyddom eich bod chi eich hun yn ymroddedig iawn i sicrhau gwelliannau sylweddol yn lles meddyliol ac emosiynol plant a phobol ifanc a’r gwasanaethau sy’n cefnogi hyn.

“Roeddech yn glir yn ystod y sesiwn fod pontio yn faes blaenoriaeth.”

Fodd bynnag, mae’n mynd ati i ofyn am gyfres o ddiweddariadau ynglŷn â phontio gwasanaethau iechyd meddwl a’r datblygiadau sy’n cael eu gwneud.

Gofynna’r llythyr wrth y Gweinidog sut y bydd hi’n sicrhau bod “ymrwymiad traws llywodraethol” i’r meysydd mae hi’n eu blaenoriaethu.

Mae’n galw am y “gyfres lawn o strategaethau a chanllawiau a luniwyd gan Lywodraeth Cymru sy’n berthnasol i’r pontio rhwng CAMHS ac AMHS,” gan nodi bod bwlch o ran gweithredu rhwng y strategaethau pontio a phrofiadau pobol ifanc gyda’r ddarpariaeth o’r strategaethau hyn.

Mae hefyd yn galw am wybodaeth bellach ynglŷn â phynciau tebyg megis pa welliannau sydd wedi cael eu cyflawni ar draws gwasanaethau pontio anhwylderau bwyta plant ac oedolion.

“Byddwn yn ymateb maes o law”

“Mae gwella’r pontio o wasanaethau iechyd meddwl plant a phobol ifanc i wasanaethau oedolion yn parhau i fod yn flaenoriaeth i ni,” meddai llefarydd dros Lywodraeth Cymru.

“Ym mis Chwefror 2022, fe wnaethom gyhoeddi canllawiau newydd yn nodi sut rydym yn disgwyl i wasanaethau gofal iechyd i blant a phobol ifanc gael eu darparu gan fyrddau iechyd yn ystod cyfnodau pontio.

“Dilynwyd hyn gan adolygiad a gomisiynwyd gan Lywodraeth Cymru, a oedd yn ymgysylltu’n uniongyrchol â phobol ifanc sydd wedi byw profiad o drawsnewid.

“Roedd yr adroddiad, Llais y Bobol Ifanc, yn nodi canfyddiadau’r adolygiad.

“Ar hyn o bryd rydym yn gweithio gyda phobl ifanc, y Gwasanaeth Iechyd Gwladol, a sefydliadau trydydd sector i fynd i’r afael â’r materion a nodwyd a diweddaru’r arfer gorau o fewn gwasanaethau iechyd meddwl.

“Rydym yn ystyried y llythyr gan Bwyllgor Plant, Pobol Ifanc ac Addysg y Senedd a byddwn yn ymateb maes o law.”