Mae Bwrdd Iechyd Prifysgol Caerdydd a’r Fro yn dweud bod ganddyn nhw ddigon o gyflenwadau, wrth ymateb i hysbyseb sydd wedi ymddangos ar y we.
Mae’n debyg bod rhestr o nwyddau wedi cael ei chreu ar wefan siopa Amazon yn gofyn i bobol eu prynu ar ran y bwrdd iechyd.
Ond mae’r bwrdd iechyd yn dweud bod ganddyn nhw “ddigon o gyflenwadau ar gyfer staff a chleifion”.
Fe ddaw ar ôl iddi ddod i’r amlwg fod gwasanaethau gofal critigol dan bwysau yng Nghymru yn sgil cynnydd yn nifer y cleifion sy’n cael eu derbyn i’r ysbyty o ganlyniad i’r coronafeirws.
“Rydym yn ymwybodol o Restr Ddymuniadau Amazon sy’n cylchredeg ar gyfer ein hadran gofal critigol,” meddai’r bwrdd iechyd ar Twitter.
“Gallwn gadarnhau nad yw hon wedi dod o Fwrdd Iechyd Prifysgol Caerdydd a’r Fro.
“Mae gennym ddigon o gyflenwadau ar gyfer staff a chleifion.
“Diolch unwaith eto am eich cefnogaeth ar yr adeg heriol hon.”
