Bydd Cymru’n cael cyfran “briodol” o frechlynnau Covid-19 gan Lywodraeth y Deyras Unedig, meddai’r Gweinidog Iechyd.
Eglurodd Vaughan Gething yng Nghyfarfod Llawn y Senedd ddydd Mercher, Tachwedd 4, mai’r bobol fwyaf bregus fydd yn cael eu blaenoriaethu.
Roedd y Gweinidog Iechyd yn ymateb i bryderon gan weinidog iechyd cysgodol Plaid Cymru Rhun ap Iorwerth mai gadael brechlynnau yng ngofal Llywodraeth y Deyrnas Unedig fyddai Llywodraeth Cymru.
“Nid yw’n deg dweud ein bod yn gadael hyn i Lywodraeth y Deyrnas Unedig,” meddai Vaughan Gething.
“Llywodraeth y Deyrnas Unedig sydd yn gyfrifol am gael brechlyn ar ran y Deyrnas Unedig gyfan.
“Pan fyddant ar gael mi fyddwn ni’n cymryd y gyfran sy’n gymesur â’r boblogaeth a faint o frechlynnau sydd ar gael.”
Pryder am argaeledd brechlynnau
Eglurodd Rhun ap Iorwerth ei fod yn pryderu y bydd argaeledd brechlynnau gan y Deyrnas Unedig yn ddim gwahanol i broblemau sydd eisoes wedi eu gweld.
“Rwy’n edmygu eich ymddiriedaeth yn Llywodraeth y Deyrnas Unedig”, meddai.
“Yn union fel gyda phrofion ac elfennau eraill o’r hyn rydym wedi’i brofi dros y saith, wyth mis diwethaf, gyda PPE ac yn y blaen, fy mhryder yw eich bod chi ofn cymryd rheolaeth.”
Mae bellach 1,344 o gleifion â Covid-19 mewn gwelyau ysbyty yng Nghymru – cynnydd o 21% o’r un diwrnod yr wythnos diwethaf.
Dyma’r nifer uchaf o gleifion â Covid-19 mewn ysbytai yng Nghymru ers Ebrill 25.
