Rhif 10 yn dathlu Dydd Gŵyl Dewi

Fe fydd Rhif 10, Stryd Downing yn dathlu Dydd Gŵyl Dewi heddiw, wrth i’r Prif Weinidog, Theresa May, wahodd gwesteion o’r diwydiant busnes, twristiaeth, chwaraeon a’r cyfryngau yng Nghymru i dderbyniad arbennig.

Bydd y digwyddiad hefyd yn gyfle i gynhyrchwyr bwyd a diod o Gymru arddangos eu cynnyrch, gyda wisgi Penderyn, gwin o Winllan Glyndwr a chynnyrch Cymreig o Gwm Farm Charcuterie yn cael eu defnyddio.

Mae disgwyl i gôr Ysgol Gynradd Pontrobert ger y Trallwng, a’r telynor Rhys Ward-Haugh, berfformio yn y digwyddiad.

“Dathlu” cynnyrch Cymru

Yn ôl Ysgrifennydd Gwladol Cymru, Alun Cairns, mae’r derbyniad heddiw yn gyfle i “ddathlu popeth sydd gan Gymru i’w gynnig i’r byd.

“Rydyn ni’n wlad falch – ac yn rhan arbennig o’r Deyrnas Unedig,” meddai. “Ac rydyn ni’n gartref i rai o’r doniau a’r diwydiannau gorau yn y byd.

“Mae entrepreneuriaid, dyfeiswyr a phobol greadigol o Gymru yn creu argraff barhaol dros y byd i gyd, gyda phob un yn cyfrannu at y chwyldro mawr ym maes chwaraeon, bwyd, y celfyddydau a busnes yng Nghymru.”