Mae Alex Davies-Jones, Aelod Seneddol Llafur Pontypridd, wedi ymddiheuro ar ôl cael ei chanfod yn euog o dorri rheolau lobïo “bychan ac anfwriadol”.
Fe ofynnodd y llefarydd Technoleg, Gamblo a’r Economi Ddigidol gwestiwn ynglŷn â’r Cyngor Prydeinig ddiwrnod ar ôl dychwelyd o daith i Japan oedd wedi’i hariannu gan y sefydliad.
Mewn gohebiaeth â’r Comisiynydd Safonau Seneddol Daniel Greenberg, fe dderbyniodd y camgymeriad, gan ddweud bod “hyn yn anfwriadol, ac yn un yr wyf yn ymddiheuro amdano”.
Argymhellodd Pwyllgor Safonau Tŷ’r Cyffredin na ddylai Alex Davies-Jones wynebu unrhyw gosb bellach.
“Roedd hwn yn doriad bach ac anfwriadol o’r Côd,” meddai adroddiad y pwyllgor.
“Mae Ms Davies-Jones wedi ymddiheuro i’r Comisiynydd am dorri’r rheolau.”
Aelod Seneddol Pontypridd yn destun ymchwiliad am achos posib o dorri rheolau lobïo
Mae Alex Davies-Jones wedi cynrychioli sedd Pontypridd ers 2019
