Mae Syr Robert Buckland wedi cael ei ailbenodi’n Ysgrifennydd Cymru yng nghabinet cyntaf Liz Truss.
Yn wreiddiol cefnogodd Syr Robert y cyn-Ganghellor Rishi Sunak yn y ras i olynu Boris Johnson, ond fe newidiodd ei feddwl yn ystod yr ymgyrch oherwydd ei fod o’r farn mai Liz Truss oedd “y person cywir i symud y wlad yn ei blaen”.
Yn enedigol o Lanelli, cafodd ei addysg ym Mhrifysgol Durham, gan raddio yn y Gyfraith yn 1990 a’i alw i wasanaethu’r flwyddyn ganlynol gan fynd yn ei flaen i weithio yng Nghaerdydd, Llundain a Chanolbarth Lloegr.
Cafodd ei ethol yn Aelod Seneddol yn 2010.
Roedd Aelod Seneddol De Swindon yn Arglwydd Ganghellor ac yn Ysgrifennydd Cyfiawnder rhwng Gorffennaf 2019 a Medi 2021, ac yn Weinidog yn y Weinyddiaeth Gyfiawnder yn 2019, a chyn hynny’n Gyfreithiwr Cyffredinol.
Mae’n briod ers 1997 a chanddo fe a’i wraig Sian ddau o blant, Millicent a George, ac mae’r teulu’n byw yn Wroughton yn Wiltshire.
Wrth ymateb, dywedodd Liz Saville Roberts, arweinydd Plaid Cymru yn San Steffan: “Aelod Seneddol De Swindon yn cael ei ailbenodi Ysgrifennydd Gwladol Cymru.
“Prin yw hyn yn gymeradwyaeth i’r grŵp o 13 o Aelodau Seneddol Torïaidd Cymreig, gan nad yw’r un yn cael ei ystyried yn gymwys ar gyfer y swydd gan Liz Truss.”
MP for South Swindon re-appointed Secretary of State for Wales
Hardly a ringing endorsement of the 13-strong group of Welsh Tory MPs that not a single one is deemed qualified for the job by Liz Truss https://t.co/Rre66qCGEq
— Liz Saville Roberts AS/MP ??????? (@LSRPlaid) September 6, 2022
Penodiadau eraill
Mae’r Prif Weinidog newydd wedi rhoi swyddi i sawl Aelod Seneddol oedd wedi ei chefnogi yn y ras i olynu Boris Johnson.
Ymhlith y rhain mae penodi Kwasi Kwarteng yn Ganghellor a Therese Coffey yn Ddirprwy Brif Weinidog ac Ysgrifennydd Iechyd.
Yn y cyfamser mae hi wedi dewis James Cleverly i’w holynu fel Ysgrifennydd Tramor.
Mae’r cyn-dwrnai cyffredinol Suella Braverman wedi cael ei phenodi yn Ysgrifennydd Cartref, sy’n golygu nad oes yr un o’r swyddfeydd gwladol mawr yn cael eu dal gan ddynion gwyn am y tro cyntaf.
Jacob Rees-Mogg yw’r Ysgrifennydd Gwladol dros Fusnes, Ynni a Strategaeth Ddiwydiannol.
Mae Kemi Badenoch wedi cael ei phenodi yn Ysgrifennydd Masnach Ryngwladol.
Brandon Lewis sydd wedi cael ei ddewis i gymryd lle Dominic Raab fel Ysgrifennydd Cyfiawnder.
Mae Kit Malthouse, un o gynghreiriaid cŵn Mr Johnson, wedi cael ei wneud yn Ysgrifennydd Addysg.
Cafodd Simon Clarke, a chwaraeodd ran allweddol yn ymgyrch Truss, ei ddyrchafu i fod yn weinidog yn y Trysorlys dros Godi’r Gwastad, yn Ysgrifennydd Tai a Chymunedau, tra bod Chloe Smith wedi cael ei phenodi yn Ysgrifennydd Gwaith a Phensiynau.
Mae Penny Mordaunt wedi cael ei phenodi yn Arweinydd Tŷ’r Cyffredin.
Mae Jake Berry yn dychwelyd i’r Llywodraeth wedi absenoldeb o ddwy flynedd fel gweinidog heb bortffolio.
Bydd Ben Wallace yn parhau yn rôl yr Ysgrifennydd Amddiffyn, a bydd y cyn-weinidog trafnidiaeth Wendy Morton yn mynychu’r Cabinet fel prif chwip.
