Mae’r Democratiaid Rhyddfrydol yng Nghymru’n cyhuddo Liz Truss, un o’r ymgeiswyr i fod yn arweinydd y Ceidwadwyr ac yn Brif Weinidog nesa’r Deyrnas Unedig, o geisio gwneud Cymru’n dlotach, gan ddweud bod y ras am arweinyddiaeth y blaid yn “ras tua’r gwaelod”.

Daw hyn yn dilyn addewid yr Ysgrifennydd Tramor presennol y byddai hi’n torri cyflogau’r sector cyhoeddus ar gyfer staff y tu allan i Lundain a de-ddwyrain Lloegr pe bai hi’n ennill yr arweinyddiaeth.

Mae’n dweud y byddai ei chynllun yn arbed £8.8bn ac y byddai’n berthnasol i’r gwasanaeth sifil yn y lle cyntaf ond y gellid ei ymestyn i weithwyr sector cyhoeddus maes o law.

Byddai Cymru’n cael ei tharo’n arbennig o galed gan y polisi, gan mai gweithwyr Cymru sy’n derbyn y cyflogau isaf ar gyfartaledd o blith gwledydd y Deyrnas Unedig ar hyn o bryd.

‘Talu’r pris’

“Ras tua’r gwaelod ydi’r gystadleuaeth am arweinyddiaeth y Blaid Geidwadol, ac edrych yn debygol fod y cyhoedd yng Nghymru am dalu pris anallu ariannol y Blaid Geidwadol,” meddai Jane Dodds.

“Mae hi’n anghredadwy, yn hytrach na chodi’r gwastad yng Nghymru, fod Liz Truss bellach yn siarad am dorri cyflogau miloedd o weithwyr yng Nghymru sy’n gweithio’n galed yn ystod argyfwng costau byw sydd allan o reolaeth.

“Mae’r 430,000 o filwyr, plismyn a gweision sifil yng Nghymru’n haeddu gwell na’r cynnig oeraidd, analluog a gwarthus hwn.

“Daw hyn ar ôl i Liz Truss werthu ffermwyr Cymru allan ar ôl ei chytundebau masnach yn Awstralia a Seland Newydd.

“Gwleidyddiaeth gas ydi hyn gan y blaid gas.

“Rhwng Liz Truss a Rishi Sunak, mae’r Blaid Geidwadol wedi methu â chyflwyno unrhyw gynllun i helpu pobol drwy’r argyfwng costau byw ac rŵan, wrth i ni fynd i mewn i’r hyn sydd am fod yn aeaf eithriadol o anodd i’r rhan fwyaf, mae Truss eisiau cipio arian oddi ar deuluoedd sy’n ei chael hi’n anodd.

“Nid yn unig y bydd hyn yn cael effaith ar weision cyhoeddus, ond fe fydd hefyd yn cael effaith ar yr economi leol maen nhw’n gweithio ynddi gyda’r rheiny sydd wedi’u heffeithio’n profi llai o rym  gwario i’w roi yn ôl mewn busnesau lleol.

“Mae hyn heb hyd yn oed ystyried goblygiadau posib y polisi hwn ar Fformiwla Barnett sy’n cael ei roi i Gymru i’w wario ar nyrsys ac athrawon.”