Plaid Cymru yn galw am reolau llymach i’r Banc Datblygu

Mae Plaid Cymru yn galw am dynhau’r rheolau sy’n rheoli buddiannau personol uwch arweinwyr Banc Datblygu Cymru.

Yn ôl Adam Price, arweinydd Plaid Cymru, gall cael arweinwyr o fewn y Banc sydd â buddiannau busnes allanol arwain at “ganfyddiadau negyddol”.

Mae Plaid Cymru bellach yn galw am adolygiad o drefniadau llywodraethu i sicrhau eu bod yn bodloni “disgwyliad rhesymol” y cyhoedd ac nad oes unrhyw wrthdaro buddiannau gyda’r tîm sy’n arwain Banc Datblygu Cymru.

Mae Adam Price hefyd yn galw ar Lywodraeth Cymru i gyhoeddi eu Dogfen Fframwaith sy’n nodi eu disgwyliadau o ran llywodraethu, ynghyd â llythyr cylch gorchwyl a gafodd ei lofnodi ganddyn nhw gyda’r Banc.

Cafodd y Ddogfen Fframwaith ei diwygio ym mis Chwefror eleni.

Eglurder

“Ni ddylai budd y cyhoedd gael ei orgyffwrdd na’i esgeuluso gan fuddiannau preifat unigolion,” meddai Adam Price.

“Rhaid inni gael eglurder ynghylch a ddylai uwch arweinwyr Banc Datblygu Cymru fod yn buddsoddi mewn cwmnïau sy’n defnyddio gwybodaeth neu rwydweithiau a allai gael eu caffael drwy eu gwaith yn y Banc.

“Rhaid i Lywodraeth Cymru ymrwymo i adolygiad o’r trefniadau llywodraethu hynny i sicrhau eu bod yn bodloni disgwyliad rhesymol y cyhoedd nad oes unrhyw wrthdaro buddiannau o fewn Banc Datblygu Cymru.”