David Davies yn pryderu am gamargraff y Welsh Not

David Davies
Mae aelod seneddol Mynwy, David Davies, wedi dweud wrth brif ohebydd y Western Mail, Martin Shipton, mai chwedl yn bennaf oedd hanes y Welsh Not yn ysgolion Cymru er mwyn annog rhagfarn yn erbyn y Saeson.

Dywedodd David Davies ei fod yn bryderus fod adroddiadau anghywir am y Welsh Not wedi rhoi’r argraff i bobol ifanc Cymru fod Llywodraeth Prydain wedi bod yn gyfrifol am atal yr iaith Gymraeg yn ystod y 19eg ganrif. Doedd hynny ddim wedi digwydd, meddai.

Roedd wedi ymchwilio i’r Welsh Not, meddai. Roedd y Llyfrau Gleision a gyhoeddwyd yn 1847 yn sôn am y Welsh Not ond roedd hynny ymhell cyn unrhyw ymyrraeth gan y llywodraeth i’r system addysg, meddai David Davies.

“Hyd nes Deddf Addysg 1870, doedd gan y wladwriaeth ddim rhan i’w chwarae mewn ysgolion, felly doedd yr hyn a welwyd gan yr arolygwyr a ysgrifennodd y Llyfrau Gleision ddim oll i’w wneud gyda’r Llywodraeth.

“Roedd yr athrawon a weithredodd y Welsh Not yn Gymry a byddai’r gosb wedi ei weithredu gyda chaniatâd rhieni.

“Wrth gwrs, does gen i ddim cydymdeimlad gyda’r Welsh Not ond mae’n bwysig cydnabod nad oedd wedi cael ei orfodi gan Lywodraeth Prydain,” ychwanegodd.

Llywodraeth Geidwadol Brydeinig wnaeth sicrhau fod dysgu Cymraeg mewn ysgolion yn orfodol hyd at lefel TGAU, meddai David Davies.

6 sylw

DC 18 Tachwedd 2012, 09:20

A Phalisteiniaid sy’n gyrru’r teirw dur (‘bulldozers’) sy’n dymchwel tai Palisteiniaid er mwyn gwneud lle i dai i wladychwyr Israelaidd. Mae David Davies yn awgrymu fan hyn nad oedd a wnelo Imperialaeth ein cymdogion Seisnig dim a gwahardd y Gymraeg o’n hysgolion. Pam? Doedd hyn ond yn gam nesaf rhesymegol mewn proses a oedd wedi gwahardd y Gymraeg o fyd cyhoeddus. Fe wnaethpwyd yr un peth yn yr Alban gyda’r Celtic Not. Ac eironi addysgol y peth oedd ei fod o’n cael ei werthu fel rhan hanfodol o addysg ar gyfer byd gwell i genedl a oedd eisoes (yn wahanol i Loegr) yr un mwyaf llythrennog yn Ewrop ar y pryd – yn ei hiaith ei hun.
Ond mae dyn yn ymwybodol mai David Davies sy’n dweud hyn ac yn tybio o’r herwydd mai’r hyn mae o’n ceisio ei wneud ydi cyfiawnhau perffeithrwydd ei weledigaeth ei hun – hyd yn oed yn y pethau hynny lle mae ei amherffeithrwydd yn hollol amlwg.

Gons 18 Tachwedd 2012, 09:29

Penawd hollol hollol gamarweiniol gan arwain dyn i gredu fod gohebwyr Golwg (os ydy’r fath smonach yn haeddu’r term gohebiaeth) eisiau i’r darllenydd gredu fod David Davies wedi dweud mai chwedl ydi’r Welsh Not.

O ddarllen y stori daw’n amlwg mai nid dyna ddywed David Davies o gwbl. Dywed fod y Welsh Not wedi bodoli, nad oedd yn ei hoffi, mai’r Ceidwadwyr orfododd elfen o addysg Gymraeg ar bawb, ac nad oedd y Welsh Not yn bolisi llywodraeth Prydain.

Nid yw wedi awgrymu yn yr unlle mai chwedl oedd y Welsh Not! Mae’n glir mai dweud y mae mai chwedl yw fod llywodraeth prydain a’r llyfrau gleision wedi cefnogi/hyrwyddo’r Welsh Not. Gwyr pawb call ei fod yn gywir – athrawon Cymraeg a Chymreig oedd yn gorfodi’r Welsh Not. Nid yw hynny’n lliniaru dim ar y peth – dyna sut mae pobl a goncrwyd yn ymddwyn. Wedi i’r dyn gwyn ddweud “The only good Indian is a dead Indian” sawl tro daeth y tristwch enfawr o glywed Indiaid yn dweud “The only good Indian is a dead Indian”. Dyna drasiedi y Welsh Not.

Ai R.S.Thomas ddywedodd rhywbeth tebyg i: “elbowing our language. Into the grave that we have dug for it”?

Credaf fod David Davies yn haeddu ymddiheuriad cyhoeddus gan Golwg. Neu mi fyddaf yn mynd at Gomisiwn Cwynion y Wasg.

Iestyn 18 Tachwedd 2012, 09:29

Golwg 360. Ble mae David Davies yn dweud taw Chwedl oedd y Welsh Not? Os ydych chi am gyfieithu straeon y Western Mail, a fyddai’n bosib eu gwirio nhw yn gyntaf i weld a ydy’r stori wir yr yn dweud yr hyn mae’r pennawd yn ei awgrymu?

Bedwyr Clwyd Griffiths 18 Tachwedd 2012, 10:59

Mae David Davies apologists mas heddi. Mae amlwg wrth ddarllen ei sylwadau mae chwedl mae on credu yw’r welsh not. A dwi’n falch ei fod e wedi dweud hyn un gyhoeddud fel bod ni gallu gweld faint mor cymaint o idiot gwrth-gymraeg ydi e go iawn.

Ben 18 Tachwedd 2012, 13:13

Mae’n iawn, doedd y Llywodraeth ddim wedi gorfodi’r Welsh Not, ond beth nad oedd y twpswyn yma yn ddigon deallus i sylweddoli oedd pam roedd Cymry yn gwneud hynny gyda caniatad rhieni. Roedd y Llywodraeth Seisnig, trwy ddeddf gwlad, wedi sicrhau bod yna ymdeimlad o warth wrth siarad Cymraeg ac mai iaith isel ei statws oedd hi. O achos hynny, roedd atal plant rhag siarad yr iaith a dysgu Saesneg iddyn nhw (prif nod ysgolion bryd hynny, chwedl y rhan fwyaf o Gymry) yn hollbwysig. Nid o Gymru ddaeth y teimlad a’r awydd yma i gyflymu tranc y Gymraeg, ond oddi wrth lwyodrarth imperialaidd-ymosodol

Gwyndaf Richards 18 Tachwedd 2012, 15:19

Diolch iestyn

Mae’r sylwadau wedi cau.

David Davies yn pryderu am gamargraff y Welsh Not

Nid Llywodraeth Prydain oedd yn gyfrifol meddai

Poblogaidd

Swyddi

Cynhyrchydd (Dwy swydd)

Cyfathrebwr Estyn Allan STEM (40% CALl)

Cynorthwyydd Materion Rheoleiddiol Ofcom Cymru

Pennaeth y Gwasanaethau Cyfreithiol (Dros Gyfnod Mamolaeth)

Cyfarwyddwr Astudiaethau Caplaniaeth

Swyddog Arweiniol Data

Swyddog Prosiect Ymbweru Bro (ardal Wrecsam)

Crëwr Cynnwys Digidol

Tiwtor Cymraeg ar gyfer y Gweithlu Addysg

Rheolwr Aelodaeth

← Stori flaenorol

Cymdeithas yr Iaith am fynnu “Mwy na Miliwn”

Stori nesaf →

Tân mewn tref sianti ym Mangladesh

Hefyd →

Fy Hoff Raglen ar S4C

6 sylw